Ғалым Қайымның қабірін қиратқан кімдер?

Осыдан тура бір ай бұ­рын Қайым Мұха­мед­ханов тұрған үй қабыр­ғасына қойылған ескерткіш-тақтаны бел­гісіз біреулер жөндеуге келместей еткен еді. Енді қаскөйлер абайтанушы ғалым жерленген бейіт­ті бүлдіріп кетті. «Бұл – ұлы тұлғаға қарсы бағытталып, әдейі жасалған кезекті ванда­лизм!» – дейді ғалымның ұлы Қанағат Мұхамедханов.
«Туған ел – алтын бесік, ұшқан ұям, Көз жұмылмай тұрғанда қайтіп қиям?! Тарта гөр, Семейімнің топырағы, Төстіктей жеріңе мен еркін сыям...». КАРЛАГ-тың азабын тартып, тас қапаста жатқанда туған жерін аңсаған ақынның жүрегінен осындай өлең жолдары туып еді...
Ғалымның зиратында осы сөздер ойылып жазылған және ақын бейнесі кескінделген мәрмәр тасты белгісіз біреулер жұлып алып, жерге тастапты. Цемент тұғырын бүлдірген. Бір ауыр затпен соққылаған тәрізді. Қаскөйлер зираттың темір қоршауларын сындырып ке­тіп­ті. «Бұл – ұлы тұлғаға қарсы әдейі жасалған ке­зекті вандализм!» – дейді ғалымның ұлы. Өйт­кені Қайым Мұхамедхановтың кескіні бей­­неленген ескерткішке қасақана шабуыл осы­дан бір ай уақыт бұрын орын алған бо­латын.
Қайым Мұхамедханов Семейдегі Ибраев көшесі 155-үйде 1944-2004 жылдар аралы­ғын­да тұрған. Төл әдебиетіміздің тарланы осы үйде өмірлік шығармаларын жазды. «Ер қа­зақ ежелден еркіндік аңсаған!» деп, ұл­тымыздың ғасырлар бойғы арманын өлең шу­мақ­тарына сыйдырған Қазақ КСР-інің тұңғыш Әнұранын да осында тұрғанда қағазға түсірген еді.
Қанағат Мұхамедханов, Қайым Мұхамедхановтың ұлы:
– Тәртіп сақшылары ескерткіш тақтаны бүлдірген адамдарды іздес­тіріп жатыр. Бірақ әзірге ешқандай нәтиже жоқ. Бұл вандализмге қатысы барлар табылып, жазаланатынына үміттенемін.
Қайым Мұхамедхановтың ескерт­кіш тақтасы бұзылғалы көңілі жай таппай жүрген Қанағат Мұхамедханов мамырдың 11-і күні әкесіне құран бағыштауға зират басына келді. Бү­лінген зиратты көріп, төбесінен жай түскендей болды. Бірден жергілікті әкімшілікке хабар берді. «Соңғы рет осында желтоқсан айында келгенде бәрі орнында тұрған. Қаскөйлердің мұны әдейілеп істегені көрініп-ақ тұр. Өйткені маңайдағы зираттар мен олардың қоршаулары дін аман, – дейді ғалымның ұлы. – Бейнесі кескінделген плита тұғырынан құлап қалған. Тұғырының өзі бүлінген. Қоршауының темірлері ауыр затпен ұрып құлатылған. Бұл кезекті вандализм деп ойлаймын».
Қайым – ақын, жазушы, ағартушы, драма­тург, абайтанушы ғалым, Алаштың арысы. Қазақ­станның мемлекеттік сыйлығының лауреа­ты, құр­метті профессор. Ұлтының тәуел­сіз­­дігін аңсаған қазақ зиялысының мәңгілік мекенінің ойрандалуы жауапты орындардың назарын аударуы тиіс. Қазақ қайымын ардақтай алмаса, ертеңгі ұрпақ алдында мәңгілік қарабет болары анық.