Алматылықтар Малайзия асханасы мәзірімен танысты

Бүгінгі Алматы – әлемнің түрлі елінің мәдениеті мен әдеті жарасқан мегаполис. Әсіресе соңғы уақытта шаһарда ұлттық асханалар қарқынды дами түсуде. Өткен сәрсенбі күні Алматыдағы Hyatt Regency Almaty қонақ үйінде Малайзия асханасы көпшілікке тағы бір таныстырылды.

Бұл шараны Малайзияның Қазақстан­дағы елшілігі, «Туризм Малайзия» ұйымы, «Эйр Астана» әуе компаниясы, Hyatt Regen­cy Almaty қонақүйі бірлесіп ұйымдастырды. Осымен екінші рет қолға алынған фестиваль «Малайзия асханасының фестивалі – 2010» деп аталды. Шараға тек қала қонақтары емес, шетелден арнайы меймандар келді. Онда қонақтар ең әуелі Малайзия асхана­сының ас мәзірімен танысты. Ұйымдасты­ру­шылардың сөзіне қарағанда, түрлі тағам­дарды Малайзиядан арнайы келген ас­паз­дар дайындайды. «Малайзия тағамдарының бір ерекшелігі, оның құрамында ащы қос­па­лар көптеу болады. Сондықтан астан ауыз тиерде абай болыңыздар», – деді ұйымдас­тырушылар қонақтарға қалжыңдап. Кеште алматылықтар малайзиялық әртістердің өнер­лерін де тамашалады. Сазды әуеннің ырғағымен тербеле билеген бишілер, ма­лай ұлтының сызылтып салған әндері көрер­мендердің жүрегіне ыстық ықылас ұялатты. Мамандардың айтуынша, «Малай­зия асханасының фестивалі – 2010» шара­сы қазанның 20-сына дейін жалғасады. Осы уақыт ішінде қала тұрғындары мен қонақ­тары тек қана Малайзия асханасымен ғана емес, мәдениетімен де жақын таныса алады. Кеш соңында «Эйр Астана» әуе компаниясы лоторея ойнатып, қонақтарға Алматы–Куала-Лумпурға, Борное аралын­дағы Кото-Кинибалу қаласына, Куантан демалу айлағына билеттер, басқа да сый­лық­тар үлестірді.
Дато СО Чин ХОН, Малайзияның Қазақстандағы елшісі:
– Біз «Малайзия асханасының фес­тивалі – 2010» шарасын осымен екін­ші рет өткізіп отырмыз. Былтыр бұл шара өте табысты ұйымдастырылды деп айт­қым келеді. Себебі алғашқы рет ұйым­дастырылғанына қарамастан, фести­валь­ге қатысқан қонақтардың қарасы өте көп болды. Менің ойымша, Малай­зия асханасы қазақ халқына тек малай ұлттық тағамдарын таныстырып қана қоймайды, екі елдің мәдениетін, адам­да­рын да жақындастыра түседі. Бүгінгі кешке Малайзиядан арнайы аспаздар­мен бірге өнерпаздар да келіп отыр. Олар да өздерінің өнерлерімен жұртшы­лықты қуантады ғой деп ойлаймын. Өз басым «Малайзия асханасының фести­ва­лі» шарасын өте сәтті ұйымдастырылған жоба деп ойлаймын. Сонымен бірге осы сәтте шараны қолға алуға мұрындық болып, демеушілік жасағандарға да үл­кен алғысымды білдіргім келеді. Былтыр біз «Эйр Астана» әуе компаниясымен Алматы–Куала-Лумпур әуе қатынасын жолға қойдық. Биыл бұл сәтті қадамның бір жылдығы деп айтқым келеді. Қазір аталған компания Куала-Лумпурға екін­ші әуе жолын ашпақшы. Енді ол жолмен екі ел азаматтары апта сайын бір-біріне қатынай алады. Мен Малайзия мен Қазақстанның арасында күн сайын әуе көлігі жүретін уақытты асыға күтемін.
Ибрагим ДЖАНЛИЕЛЬ, «Эйр Астана» әуе компаниясының сату және маркетинг жөніндегі вице-президенті:
– Барша алматылықтарды «Малай­зия асханасының фестивалі – 2010» ша­ра­сы­мен құттықтаймын. Қазақстанда осымен екінші мәрте қолға алынып отырған шараның маңызы зор. Өткен жылы Дато СО Чин Хон мырза екеуміз Алматы–Куала-Лумпур әуе жолын ашу туралы ақылдасқан едік. Шынын айту керек, сонда біз бұл жобаның болаша­ғына онша сенімді болған жоқпыз. Қуанышқа орай, бұл жобамыз сәтті жү­зе­ге асты. Енді, міне, осы жоба арқылы екі ел арасындағы мәдени байланысты да жолға қойып отырмыз. Біз қараша айында Алматы – Куала-Лумпур бағы­тын­дағы екінші әуе жолын ашуды жос­пар­лаудамыз. Осы жобамыз да сәтті шы­ға­ды деген ойдамын.

Дерек
Алматы – Куала-Лумпур әуе жолы 2009 жылдың 1 қазанында ашылды. Осы уақыт ішінде әуе рейсі 13 393 адамға қызмет көрсетіп, 30 809 тонна жүк тасымалдады. Алматыдан Куала-Лумпурға жүру уақыты – сегіз сағат.