Шымкенттегі емшіге қаралушының бірі оның айықпас дертке шалдыққандардың өзін аяққа тұрғызғанын, оның емшілігі жайлы айтып берді.
Бұл туралы Замана басылымы хабарлайды.
Мен арамызда жүрген өте дарынды, керемет дауагер, соған қарамастан аса қарапайым азамат - Үрмет емші жайында өз ойымды көпшілікпен бөліскенді жөн көрдім.
Әлі есімде, 1992-жылы Шымкенттің «Шығыс» мөлтекауданында бір ер кісі бізге қарама-қарсы үйдің екінші қабатында пәтер жалдап тұратын. Оның 10 және 12 жас шамасындағы екі қызы болатын. Көктем шығып, күн жылына бастаған кезде сол кісінің үйіне көп адам келе бастады. Таң атқаннан күн батқанша адам қарасы үзілмеуші еді, бірі келіп жатса, екіншісі қайтып бара жататынын көріп жүрдім. Сөйтсем ол кісі емші екен. Сол жылдары емші деген қаптап кеткен еді. Үйіміздің дәл алдында болған соң анам соған кіріп шығыпты. Үйі екі бөлмелі екен.
Інім іштен кемтар болып туылған еді. Екі қолы аузына жетпейді. Отыра да алмайды. Анам сол інімді көрші үйдегі емшіге көрсетейін деп алып кетті. Содан бастап інімді көтеріп, күнде сол үйге кетеді. Ақыры бір күні інім өздігінен отыра алатын болды. Көздерінің айналып кететіні де тоқтап, көп ұзамай өзі жүре алатын жағдайға жетті. Тағы аз уақыт өткенде денсаулығы толық түзеліп, ауруынан жазылды. Бұған дәрігерлер де, туған-туыстарымыз да таңқалды. Дәл қазір сол інім еңгезердей жігіт.
Ал 2015-жылы күтпеген жерден өзім ауырдым. Медициналық білімі жоғары, тәжірибесі зор, өте білікті деген дәрігерлердің айтқанын бұлжытпай істеп, тиянақты емделдім. Сырқатым жатыр мойны қатерлі ісігі (обыр) еді. Келе-келе ол кеудеме әсер ете бастады. Омырауым сыздап, ұйқы естен шықты. Жақсы емші, молдаларға да көріндім, одан әсер жоқ. Күннен-күнге әлім құрып, бойымнан дәрмен қашты.
- Сен Үрмет емшіні тап. Бір көмектессе, саған сол көмектеседі, - деді.
Үрмет емшінің қабылдауына бардым. Әуелі - Алла, содан кейін емшінің біліктілігі десем жарасады, бір апта ішінде өзімді тәуір сезініп, тыныш ұйықтайтын болдым. Үрмет емшіден екі ай ем алдым. Осылай сұмдық сырқаттың беті қайтып, жазылдым.
Үрмет емшінің ем құдіретін күні бүгінге дейін ешкім ашық жазбаған. Қанша адамдар айықпас ауыр деген ауруларынан жазылып кетіп жатқанымен, құдіретті қасиетін білгенімен емінің құпиясын, мағынасын түсінбейді. Тек өздерінің ауру-дертінен айыққанын ғана айта алады. Мен медицина саласының маманы болғандықтан оның еміне мұқият зер салдым, құпиясын білуге тырысып, мән беріп қарадым. Бірдеңе ұғу мүмкін емес. Білгенім тек мынау: бұл кісіні құдіретті бір күш қолдап тұр. Солай ұғындым.
Бүгінде жетпіс жасқа таяған Үрмет ата өз бойындағы құпиясы жайында ешкімге тіс жармайды. Құранның қасиетті аяттарымен ем жүргізеді. Емдеу барысында шөп дәрі беріп, таблетка іш, укол салдыр деп жатқан жоқ. Оның қолданатыны - қазақтың көнеден келе жатқан қарапайым емі. Қазір емнің бұл түрі мүлде ұмытылып кеткен.
Үрмет емші көп адамды қатар қабылдап, опыр-топыр етпейді. Бар-жоғы айына 3-4 адамды ғана емдейді. Өйткені өз үйінде одан артық адамға орын да жоқ. Білгішсініп, аласұрып, бірінен кейін екіншісін кіргізіп, табыс табуды көздемейтін адам. Тағы бір байқағаным, оның алдына жанына шипа таба алмай, бармаған жері жоқ, басар тауы қалмаған, аурумен арпалысудан шаршап, өмір түгілі өзінен-өзі түңілген адамдар ғана барады екен.
Үрмет ата Құран ашып отырып сөйлейді, тамыр ұстайды. Сәуегейлік айтпайды, бос сандырақ, солқылдақ әңгімеге жол бермейді. Қарақұрт, кене, жылан уларын, бауырдың түрлі сырқатын, сарыпты (бруцеллез), мерез, әйелдердегі қан кету, эрозия, түсік тастау, перзент көтере алмау, талма, аяқ-қолдың қақсауы, балалардың іштен туған сал аурулары, көкжөтел, қан қысымы, сүйек құрты, көз жара, іркілдек без, көтеріліп ауыру, қояншық, елірме сияқты ауруларды тек оқып қана қайтару қандай күшті қасиет десеңізші!
Обыр сырқатының клеткалары емделген адамның қанында болмайды. Бұл емнің ерекшелігі сол - адам денесіндегі барлық сырқаттардан айықтырады, сонымен қатар ем алған адамның қаны толық тазарып, өзі жасарып, өмірі ұзарады. Аспа кесел (суицид) ауруын тамыр ұстап отырып алдын-ала анықтауы ол кісінің бойындағы қасиетінің мықтылығы деп білемін.
Ол кісіні жұрт тектен-тек «Құпия аурулардың көріпкелі» деп атамайды. Оның емі үлкен зерттеуді қажет етеді. Медицина қарыштап дамыды десек те арамызда қаншама адам дертіне шипа таппай сандалып жүр. Сондықтан ұлтымыздың ұмытылып кеткен қасиетті, құдіретті қарапайым қара еміне жоғарыдағы азаматтар көңіл аударса, оның халқымыздың денсаулығына пайдасы мол болар еді.