Министрлік қауіпті дәрілерге қатысты қауесетке түсініктеме берді
2015 жылдың 23 қыркүйегінен бастап Facebook әлеуметтік желісінде медициналық препараттарды қабылдағаннан кейін туындаған аллергиялық реакциядан балалардың қайтыс болғаны туралы таратылған ақпарат жалған болып табылады. Бұл туралы AlmatyNews АА-нің тілшісі ҚР Денсаулық сақтау және әлеуметтік даму министрлігінің баспасөз қызметіне сілтеме жасай отырып хабарлайды.
ҚР Денсаулық сақтау және әлеуметтік даму министрлігі дәрілік құралдардың жанама әсеріне тұрақты тұрде мониторинг жүргізіп отырады.
«2015 жылғы 25 қыркүйегіндегі мәлімет бойынша аллергиялық реакция туындатып, балалардың өлім-жітіміне себеп болды деген дәрілік құралдар (амоксициллин, капесула, ибупрофен (суспензия), алклофенак, ангисепт, сумамед, ингалипт, инфлюцид, балаларға арналған панадол және санасол) туралы ешқандай шұғыл мәлімет келіп түскен жоқ», - делінген хабарламада.
Естеріңізге сала кетейік, ағымдағы жылдың ақпан айында қалта телефондарына арналған WhatsApp хабарлама алмасу жүйесі арқылы осы тәріздес шындыққа жанаспайтын ақпарат таратылған болатын. Осыған орай ҚР Денсаулық сақтау және әлеуметтік даму министрлігі ҚР Ішкі істер министрлігіне, ҚР Бас прокуратурасына және ҚР Ұлттық қауіпсіздік комитетіне жалған ақпаратты таратудың жолын кесуге шара қолдану туралы хат жолдаған болатын.
