Заманауи электронды БАҚ қазақ журналистикасына қалай әсер етті?

Алдан Смайыл, Парламент депутаты:
– Электронды БАҚ дәстүрлі БАҚ үшін үлкен жаңалық болды. Бұл сала аудиторияға деген таласты күшейтті. Негізі, электронды БАҚ қазақ журналистикасының бойына қан жүгіртті деп айтуға бо­лады. Электронды БАҚ – үлкен ғылыми ізденісті қажет ететін са­ла. Ал бізде журналистерді дайындайтын оқу орын­дары кә­сіби маман дайындап шығармайды, сол өкінішті. Оның үстіне оқу бағдарламалары ескірген әрі ғылыми-техникалық базасы жұтаң. Ме­нің ойымша, бізге Вашингтондағы әлемге әйгілі Теле­ви­зия және ра­диохабарларын тарату академиясы немесе Нью-Йорк­тегі теле және ра­дио өнері факультеті үлгісіндегі білім ша­ңырағы керек. Мен де­пу­тат­тық сауал жолдап, Журналистика уни­верситетін ашу туралы ұсыныс жа­саған едім. Айта кетейін, біз­де еліктеушілік басым. Не көп – шоу көп.  Бір ауқымды тақы­рыпты таңдап алып, оны жүздеген қатысушылардың ор­тасында тал­қыға салу, менің ойымша, дұрыс емес. Ұлттық, мем­лекеттік мәселені көкпарға салғанды мен қолдамаймын. Өйткені көбі оның байыбына барып жатпайды, үстірт талқыланады. Халықты оя­ту­дың орнына ықыласын суытып жіберіп жатыр.

Ғаділбек Шалахметов, Халықаралық журналистика академиясының академигі:
– Қазір заманауи электронды БАҚ-қа көшу үдерісі қар­қын­ды жүріп жатыр. Электронды БАҚ қазақ журна­лис­ти­ка­сының заман ағымынан қалыспауына ықпал етіп отыр. Жа­ңадан пайда болған мұндай БАҚ тек қазақ емес, жалпы, отан­дық ақпарат кеңістігіндегі бәсекелестіктің күшеюіне ық­пал етті. Бүгінгі күні әрбір адамзат керек ақпаратын элек­тронды БАҚ-тар арқылы алуға дағдыланып келеді. Бұл, әрине, жақсы. Қазіргі журналистер, соның ішінде қа­зақ журналистикасының бет алысы, менің ойымша, тәп-тәуір. Тәуелсіздік алғанымызға көп бола қойған жоқ. Ал­ғаш­қы жылдардағыдай емес, қазір заманға сай мамандар қа­тарының артқандығы байқалады. Ақпаратты жедел бе­руге машықтанған. Әрине, мұнымен тоқмейілсуге бол­майды. Білімді-білікті журналист дайындау әлі де өзекті мә­­селе күйінде тұр.  Қазір отандық қазақтілді сайттар қата­ры кө­бейіп келеді. Бұрындары біздің БАҚ шетелге мүлде шық­пайтын. Қазір осы электронды БАҚ-тың көмегімен төрт­кіл дүниемен байланысымыз да жақсарып келеді.

Ұлбосын Айтөлен, «Айқын» республикалық қоғамдық-саяси ақпараттық газетінің журналисі:
– Қазақ журналистикасының даму тенденциясын жоққа шығаруға бол­майды.  Билік пен халық арасындағы дәнекер БАҚ-тың өзіндік рөлі бұ­рынғысынан да нығайып, төртінші билік ретіндегі қауқарын кү­шейтті. Заманауи электронды БАҚ-тар қазақ журналистикасына жаңа ты­ныс, жаңа серпін әкелді. Электронды БАҚ арқылы жур­на­лис­те­ріміз ақпаратты жылдам әрі қызықты таратуға машықтанды. Со­нымен қатар таратылып отырған тақырыптардың ауқымы кеңейіп, нақ­ты дерек беруге сеп болды. Қысқасын айтқанда, қазақ жур­налистикасы электронды БАҚ-ты тиімді пайдалануда. Әлбетте, түзелуі тиіс тұстары жоқ емес. Алайда ақпарат кеңістігіндегі бәсе­ке­лестік да­мы­ған сайын, орын алып отырған олқылықтар да оңала бас­тай­тыны бел­гілі. Ал ХХІ ғасырдағы ІТ-технологиясы дамылсыз қарыштап отыр­ған мына заманда бәсекелестік те дами түспек.  Бір айта кетерлігі, қа­зақ жур­налистерінің шеберлігін, кәсібилігін арттыру тек өздеріне ғана емес, мем­лекетке де қатысты. Өйткені аймақтағы қазақ жур­на­лис­тикасы заманауи тех­нологияға зәру. ІТ-технологиясы тек қалалық емес, даладағы әріп­тес­терімізге де қолжетімді болған жағдайда ғана қа­зақ журналистикасының бағы жанбақ.