Отандық телеарналар жеңіл-желпі ток-шоуларға тым әуестеніп кеткен жоқ па?

Бекзат Жүсіп, «Хабар» телеарнасы жаңалықтар қызметінің редактор-дикторы:
– Ол рас. Қазір ток-шоулар тым көп. Негізі, көп бол­ға­ны дұ­рыс. Көрермен жақсысын өзі таңдайды. Кө­рер­мені аз, рейтингі төмен бағдарламаның ғұмыры қысқа. Оған қо­са, сан бар жерде бәсекелестік туындап, сапа да артады. Бір-бірінен асып түссек, жақсы тақырып ұсын­сақ, оны жан-жақты ашсақ деп ұмтылады. Алайда, өкі­нішке қарай, бізде олай болмай отыр. Алаңдайтын екін­ші жа­ғы тағы бар. Бұл – таптаурын тақырып, жеңіл сөз, жа­уыр болған жұлдыздар, сауатсыз режиссура т.б. Және көп­шілігі ток-шоу форматының толық мүмкіндік­терін пай­­даланып жатқан жоқ. Бізде мо­дераторды (жүр­гізуші), жалған кейіпкерді (жасандылық көзге ұрып тұ­рады), қозғалып жатқан тақырыптың иісі мұрнына да бар­майтын мектеп оқушыларын топырлатып жинап ала­мыз, болса арзандау бірді-екілі кіріспе сюжет қыс­тыра са­ламыз. Жауапты тұлғаларды, мемлекеттік орган өкіл­де­рін де шақырмаймыз, шақырсақ келтіре алмаймыз. Міне, көпшілігінің сиқы осындай.

Жарас Ниязбек, «31арна» «Информ бюро» қызметінің редакторы:
– Бүгінде елге қажетті хабарлар мен елді сусындататын бағ­дарламалар жоқтың қасы. Екі клип пен төрт әні бар әнші қыз-жігіттер телеарналарды жаулап алды. Қазақта «тауық сойса да, қа­сапшы сойсын» деген сөз бар. Тарихи танымды кеңейтер, кө­рер­менге ой салар, ұлттың ұлылығын ұлықтайтын құнды теле­өнім­дерді «жұлдызды» шоулар шырмап тастады. Жылтырағанның бә­рі алтын деп ойлайтын, рейтингке байланған басшылардың әншілерсіз таңы атып, күні батпайды. Қоғамда сахна көрген, ел алдында жарқ етіп бір көрінген  жасанды әншілердің пікірі бә­рінен құнды. Олар тарихи мәселеге де, қоғамдық-саяси құбы­лыс­тарға да, экономика, пәлсапа, әлеумет, әдебиет, психология, ас­паздық, бәріне де әнші пікір білдіреді. Телеарна – үлкен тәрбие құ­ралы. Көрермендердің талғамын ескерген де жөн шығар. Ма­ғыналы, мазмұны терең, ой салатын телеөнімдерді қабылдауға да­йын емес деген уәж айтуы мүмкін. Алайда санасына сәуле түсіріп, бай тарих пен құнды рухани әлемге саяхат жасауға мәж­бүрлеу керек. Жеңіл, арзан дүниелер баянсыз әрі пайдасыз бо­ла­рын ескерсек, отандық телеарналарда мәнді әрі дәмді бағ­дарламалар шығару керек.

Есболат Айдабосын, «Қазақстан» ұлттық арнасы «Апта-kz» бағдарламасының жетекшісі:
– Біздің телеарналардың көбісінде «пішін» бірінші орынға шығып, «мазмұн» соның құйысқанын тістеп қалған секілді. Жалт-жұлт еткен жыл­ты­раққа әуестеніп кеткендейміз. Кезінде ой түйетін, сауатыңды ашатын бағ­дар­ла­малар көбірек еді. Рас, салмақты бағдарламалардың дені сол кезде де сынға ұшырады. Режиссурасы нашар, сөйлей беретін бастар (говоряший го­лова) кімге қызық, өйту керек, бүйту керек дейтін дәліздік күңкілдерді та­лай естідік. Осы күңкілдер ақыры солардың түбіне жетті. Ал қазір ше? Біреулер «Қуыр­дақ шоу», «Бешбармақ шоу» деп қазан-ошақты жағалап кетті, «Наша ка­­за­шаның» шала қазақтары елді күлдіреміз деп тілді бүлдіріп бітті. Бөстекі әң­гіме, арсыз күлкіге бой алдырды. Соның салдарынан есіл уақытыңызды шы­ғындап сарылып, теледидар алдында тапжылмай отырсаңыз да, эфирден есті әңгіме ести алмайсыз. Ән мен әншіні де көрінген жерге тықпалап, берекесін кетірдік. Қай телеарнаны қоссаң да – концерт. Ән салып, би билеген жұрт. Қазіргі уақытта журналистика факультетінде оқитын қыз-жігіттердің өзі шоу­мен мен журналисті айыра алмайтын деңгейге жетті. Әрине, ауызды қу шөппен сүртуге болмас. Бірер жақсы ток-шоулар бар. Бірақ аз.