Әкімдіктердің мекемелерді қала көшелерін қардан тазартуға жұмылдыра алмауы ненің белгісі?

Камал БҰРХАНОВ, ҚР Парламенті Мәжілісінің депутаты:
– Енді біз құқықтық, зайырлы мемлекетте өмір сүріп отырмыз. Сон­дықтан мұның барлығы заңдық тұрғыдан реттелуі тиіс. Мәселен, жер­гілікті мәслихат «әрбір мекеме өзіне қарасты жерлердің тазалы­ғы­на, күл-қоқыстың, қардың үйіліп жатпауына жауапты болуы тиіс» деп шешім шығаруы керек. Әрі оны тиісті органдар өз деңгейінде қа­да­ғалап, бақылап отырғаны жөн. Егер ол мекемеде қар таза­ланбаса, онда айыппұл салып, қателігін мойындату керек. Ал көше, жол бойын тазалау, ол – жергілікті әкімдіктің жұмысы. Оған жауапты ме­ке­мелер бар. Олардың да ыждаһатты жұмыс істеуге деген жауап­кер­шілігін арттырғанымыз дұрыс. Енді Алматыда қардың қалың жау­уы, ол  –төтенше жағдай. Табиғаттың тосын құбылысына ешкім тос­қа­уыл бола алмайды. Дегенмен қар тазалауға жауапты мекемелер осын­дай уақыттарда екі-үш ауысыммен жұмыс істеуіне болады ғой. Тіп­ті көлік қозғалысы аз болатын түн кездерінде қар тазалауға шықса, қан­дай жақсы болар еді. Бұл ретте жергілікті әкімдік қатаң талап қо­йып, оның орындалуына барынша бақылау жасауы тиіс. Біз осылай ет­кен­де ғана бұл мәселенің оң шешілуіне ықпал ете аламыз.

Амалбек ТШАНОВ, қоғам қайраткері:
– Таяуда Мәскеуге де қалың қар түсті, соның салдарынан кө­лік қозғалысы қиындап, кептелістер жиіледі. Бірақ Мәскеу мэрі «әрбір мекеме өздерінің тұсындағы қарды тазаласын» деп үндеу жариялап, соған халықты жұмыл­ды­рып, оларға күрек керек пе, техника керек пе т.б. құрал-сайман­дар­мен қамтамасыз етіп, дереу қарды тазалап тастады. Ал Алматы қаласының әкімі: «Қарды тазаламаймыз, қыстың көрінісін бұзудың керегі жоқ, бірақ әрбір мекеме өздерінің тұсындағы қарды тазаласын», – деді. Осы сөзді айтты-дағы, алайда ешқандай ұйымдастыру шарасын жүр­гізген жоқ. Жарайды, әрбір мекеме өздерінің маңындағы қарды та­за­лауға шықсын делік, енді олардың қолында күрегі, құрал-сайманы, тех­ни­касы жоқ болса, олар немен тазалайды? Осының бәрін жергілікті би­лік ұйымдастыруы тиіс емес пе? Демек, біздің әкімдік қала көшелерін қар­дан тазартуға халықты жұмылдыра алмай отыр деген сөз. Осының сал­дарынан қалада көлік тығыны артып, халық таңертең – жұмысқа, кеш­кісін үйіне жете алмай қиналып жүр. Мұның барлығы жергілікті әкім­діктің тиісті ұйымдастыру шараларын дұрыс жүргізе алмай отыр­ған­дығының салдарынан деп есептеймін.

Жұмажан ЖАҢБЫРОВ, техника ғылымының докторы, профессор:
– Шынында да, қазір жұмыстан кешкісін қаланың ішіндегі үйімізге жету үшін екі-үш сағат жол жүретін болдық. Онсыз да Алматыда көлік тығыны көбейіп тұрған кезде «жығылғанға – жұдырық» дегендей, қар қалың жауып, одан сайын кеп­теліс болды. Жол жиегіндегі автокөлік тұратын жерлердің бар­лығы қардан тазартылмай, жүргізушілер амалсыздан кө­лік­терін жолдың ортасына қоюда. Осылайша қалада көлік­тер бір-ақ жолақпен жүріп отыр. Осының салдарынан халық жұ­мысына кешігіп келіп, үйіне дер уақытында жете алмай отыр. Жергілікті әкімдіктің әрекетсіздігінен қолдан көлік ты­ғы­нын жасадық. Бұл тәртіптің, талаптың, жауапкершіліктің жоқ­­т­ығынан деп есептеймін. Мұны шешу үшін жергілікті би­лік «әркім өз мекемесінің алдын қардан тазаласын» деп ай­ты­п қана қоймай, нақты тапсырма беріп, талап етуі тиіс. Әр­бір мекемені қар тазалауға жұмылдырып, ұйымдастыру жұ­­мы­с­тарын тиянақты жүргізгені жөн.