Қазақстан мен Швейцарияның заң шығарушы органдары арасындағы байланыс нығая түспек

Кеше Қазақстан Парламенті Мәжілісінің Төрағасы Нұрлан Нығматулин мен Швейцария Конфедерациясы парламенті Кантондар кеңесiнiң төрағасы Филиппо Ломбарди кездесіп, екі ел арасындағы парламентаралық ынтымақтастықты дамытудың жолдарын талқылады. Бұл жөнінде Мәжілістің баспасөз қызметі хабарлады.
Шара аясында қос ел парламенттерінің өзара іс-қимылын нығайту, заңнамалық салада тәжірибе алмасу, сондай-ақ ынты­мақ­тастық жөніндегі топтар арасындағы байланыстарды ынталандыру мәселелері сөз болды. Нұрлан Нығматулин Мәжіліс жұмысының басым бағыттарын айта келіп, Қазақстан Президенті Нұрсұлтан На­зар­баевтың «Қазақстан – 2050 страте­гия­­сын» заңнамалық қамтамасыз ету жолын­да атқарып жатқан істеріне тоқталды. Соны­мен қатар Швейцарияның мемлекет­тің индустриялық-инновациялық даму сала­сындағы тәжірибесі бізді ерекше қы­зық­тыратынын да атап өтті. Филиппо Ломбарди болса, өз кезегінде халықтар ара­сындағы өзара ынтымақтастықты және жалпы бейбітшілікті нығайтуға ықпал ететіндіктен екі елдің парламентаралық бай­ланысының маңызы зор екендігін атап өтті. Тараптар барлық сала бойынша қа­зақ­стандық-швейцариялық өзара қарым-қатынас деңгейін жоғары бағалай келіп, осы ықпалдастықты одан әрі нығайту екі мемлекет басшыларының да етене байланысына өзіндік әсер ететінін тілге тиек етті. Мәжіліс Төрағасы Нұрлан Нығ­мату­лин Швейцария соңғы бес жыл көле­мін­де инновациялық даму жолында әлемдік ор­талыққа айналғанын, Қазақ­стан эконо­ми­ка­сын жаңғырту бағдарла­масы аясында өзара тиімді ынтымақтас­тықты нығайту­дың керемет мүмкіндігі барлығын да айт­ты. Сондай-ақ кездесуде сауда-эконо­ми­калық әріптестік, Орталық Азия аймағын­дағы қауіпсіздік, соның ішінде, Ауған мә­се­лелері де назардан тыс қалмады.