Полиция қызметін мінсіз болсын деп...

Полицияның бір міндеті елдің ішкі тыныштығын күзетіп, азаматтардың бейбіт өмірдегі қауіпсіздігін қамтамасыз ету болғандықтан, ең алдымен, оның өзінің құқықтық тәртібі мен адамгершілік, ар-ұждан деңгейі жоғары болуы тиіс. Ішкі істер министрлігінің діттегені де – осы. Сол себепті де министрлік ішкі істер қызметкерлерінің білімі мен біліктілігін көтеру мәселесіне баса мән беріп, осы мақсатта ілкімді қадамдар жасап келеді.
Соның бір айғағы – полиция қызметін­дегі заң және тәртіп қағидаттарын күшейту мақсатында құрылған қоғамдық кеңестер, ардагерлер бірлестіктері және тәлімгерлік институттар. Аталған институттар іс жүзінде полиция қызметкерлерінің құқықтық тәртібін ғана емес, олардың өз жұмыстарын же­тілдіру талпыныстарын да бақылап отырмақ. Бір ғана мысал, қазір ішкі істер қыз­меткерлерінің жұмысына байланысты Тә­лім­герлер кеңесі деген бар. Осы тәлімгер­лер кеңесінің жұмыс нәтижелері тоқсан сайын сол салаға қатысты жетекшілер өт­кізе­тін оперативтік жиындарда қаралып, кем­шіліктер болып жатса, кінәлілерге дис­цип­линарлық ықпал ету шаралары қолда­нылады. Ал жақсы нәтижелер көрсетіп жатса, жас қызметкермен қатар, оның тә­лім­гер-ұстазы да көтермеленіп отырады. Мұндай тәжірибе қызметкерлердің бір-бірін өзара қолдап, білікті маманның жұ­мыс­ты жаңа бастаған әріптестіне қызметтің қыр-сырын үйретуге мүдделі қыла­тын­дығымен де маңызды болса керек.
Жалпы, қай ұжымда болмасын, қыз­меткерлері үшін бірінші басшының жауапты болуы – заңдылық. Ішкі істер органдарында да тәртіп пен заңның сақталуына әрбір құры­лымның бірінші басшылары тікелей жауапты. Дейтұрғанмен, жеке құрамды бақылау жұмысын жетілдіру мақсатында министрлік тарапынан арнайы нұсқау (инструкция) бекітіліп, ішкі істер органдары қызметкерлерінің ар-намыс Кодексі қайта қаралды. Жеке құрамның ұжымдық қа­рым-қатынастарын реттеп, жұмыстың тиім­ділігін барынша арттыру мақсатымен бұл күнде арнайы инспекция да құрылған. Осы­ның бәрі жалпы полиция қызметінің жұ­мысын ғана емес, халық алдындағы беделі мен жұрт сенімін күшейтуді көздеп отыр.