Астанаға қандай мамандықтар қажет?

Астана қаласының басшылығы жастарға кәсіптік бағыт-бағдар беру­дің жаңаша әдісін қолға алды. Енді бос жұмыс орындары жәрмеңкесімен бір­ге, қалаға қажетті мамандықтар көрмесі ұйымдастырылатын болды. Оның басты артықшылығы сол, мектеп түлектері нақты сұранысы бар ма­ман­дықтармен етене танысса, колледж және университет шәкірттері өзде­рі­­не қажетті жұмыс орындарын таба алады. Осындай шара кеше Астанада ал­ғаш рет өтті.
Бұған дейін елордада өткен жиындар­дың бірінде қала әкімі Иманғали Тасма­ғам­бетовтің заңгер мен экономистердің тым көбейіп кеткенін айтып, елордаға қа­жетті нақты мамандықтарды атап көрсет­кені есімізде. Сол кезде ол: «Астанада эко­но­мистер мен заңгерлерге сұраныс жоқ. Бүгін­де олардың арасындағы жұмыс­сыз­дық деңгейі 87 пайызға жетті. Бізге IT-технолог, программист, инженер-механик, электрик, монтажшы-құрылысшы және электр-газ дәнекерлеуші   ауадай қажет. Міне, бұл мамандықтар болашақта да өз сұранысын жоғалтпайды», – деген еді. Сөйтсек, қала әкімінің тізімі онымен бітпейді екен. Астанаға аспазшы, даяшы, бармен, нан-тоқаш өнімдерінің шебері, тігінші, автомеханик, құрылысшы-сылақ­шы, ұста, техник-сантехник, токарь, мед­би­ке және тағы басқа 30-дан астам маман­дық иелері аса қажет. Осыған орай Конгресс-холл сарайында арнайы көрме ұйымдастырылып, мектеп оқушылары қалаға қажетті мамандықтармен етене танысуға мүмкіндік алды. Аталған шара жастардың кәсіптік бағыт-бағдарын айқындауға көмектеседі деген сенім бар.
Олжас ОМАРОВ, Астана қаласының Жұмыспен қамту және әлеуметтік бағдарламалар басқармасы бастығының орынбасары:
– Көрмеде елордаға аса қажетті ма­мандықтармен танысуға болады. Ал бос жұмыс орындары жәрмеңкесінде жастар өз білімдеріне сай қызмет орындарын таба алады. Біздің негізгі мақсатымыз да осы болды: мектеп пен колледж түлек­терін сұранысы жоғары мамандықтармен таныстыра отырып, жұмысқа орна­лас­тыру. Жастар қалаға қажетті мамандық­тармен танысып қана қоймай, ол ма­­мандық бойынша қай жерде оқи ала­­тын­дығын да біле алады. Негізі, қа­зіргі кезде елорданың құрылыс саласына ғана сан алуан мамандар қажет болса, ме­дицинаға шамамен 200-дей қызмет­кер керек.
Шынымен де, бас кезінде барлығы жаппай жоғары білімді қуып кеткен кезде кәсіптік-техникалық мамандық­тардың ұмыт қалғаны жасырын емес. Оны біз енді ғана түсініп жатырмыз. Қа­зақстан халқы адам басына шаққандағы үлесі жағынан әлем бойынша «ең білімді ел» деп танылды. Бірақ сол елдің бәрі жұ­мыспен қамтылмай қалды. Себебі отан­дық экономикаға заңгер мен қар­жыгер­лер емес, қарапайым жұмыс­шылар қажет. Мамандардың айтуынша, бүгінде қарапайым жұмыс істеп те әжептәуір пайда табуға болады. Ол үшін қазіргі жас ұрпақтың, әсіресе қазақ жастарының психологиясын өзгерткен жөн.