АҚШ-тың әскери жоғары оқу орындарына іріктеу басталады

«2013 жылғы 7 қазан мен 20 қараша аралығында АҚШ әскери жоғары оқу орындарында оқитын кандидаттарды іріктеу басталады» деп хабарлайды Қазақстан Қорғаныс министрлігінің сайты.
2014 жылы Қазақстан Қорғаныс министр­лігі АҚШ-қа төрт қазақстандықты оқуға жібермек. Бұл кандидаттар төрт жыл­дық мерзімде West Point құрлық әс­керлері әскери академиясы, Әскери-теңіз күштерінің академиясы, Әскери-әуе күш­терінің академиясы, Жағалау күзеті ака­демиясы сияқты беделді жоғары оқу орын­дарында білім алатын болады. Кан­ди­даттарға мынадай талаптар қойылады: 2014 жылғы 1 шілдедегі жағдай бойынша жасы 17-23 аралығында, үйленбеген болуы тиіс. Үміткерлердің орта білім ту­ра­лы аттестатының болуы тиіс. Сондай-ақ олар ағылшын тілін жетік білуі қажет, бұл ретте білімін растайтын сертификаттары немесе дипломдарының болуы міндетті. Бұдан басқа, әскери-дәрігерлік комиссия­дан өту­дің нәтижесі бойынша, болашақ кур­санттар әскери қызметке жарамды болуы тиіс. Іріктеу мынадай тәртіппен жүргізіледі: 20 қарашаға дейін Қорғаныс істері жө­ніндегі департаменттерде жеке істер жинақталады. 3-11 желтоқсан ара­лы­ғын­да Қазақстан Рес­публикасындағы АҚШ ел­шілігінің өкілдері кандидаттармен теле­фон арқылы әңгімелеседі. 12-20 жел­тоқ­сан аралығында үміткерлер Қазақстан Рес­публикасындағы АҚШ елшілігінде әң­гімелесу және дене даярлығы бойынша сы­нақ тапсыру үшін Астанаға келеді. Ал­дың­ғы кезеңдерден табысты өткендер 2014 жылғы 31 қаңтардан бастап SAT және TOEFL сынақтарын тапсыратын болады. Үміткерлердің АҚШ жоғары оқу орындарына түскені туралы ақпарат ша­мамен 2014 жылғы мамыр айының ба­сында белгілі болады. Олар 2014 жылғы маусым айының ортасында Әскери ант қабылдаған соң Америка Құрама Штат­тарына оқуға жіберіледі. Жол жүрер ал­дында курсанттар ҚР Қарулы Күштерінде әскери қызмет өткеру туралы келісім­шарт­қа қол қояды. АҚШ әскери оқу орнын біті­рушілер Отанына оралған соң Қазақстан армиясында ең кемі 10 жыл қызмет етулері керек. Сонымен қатар өткен жылы осын­дай іріктеу нәтижесінде екі қазақстандық АҚШ-та оқуға сертификат алған болатын. Абылай Ахметов Құрлық әскерлерінің West Point әскери академиясына оқуға түссе, Ілияс Камалединов АҚШ Қарулы Күш­тері Әскери-теңіз академиясында білім алуда.