Тамас Қалмұхамбетұлы Айтмұхамбетов

 Тамас Қалмұхамбетұлы Айтмұхамбетов 1939 жылы 13 желтоқсанда Ресейдің Астрахан облысында дүниеге келген. 1966 жылы әл-Фараби атындағы Қазақ мемлекеттік университетін құқықтану мамандығы бойынша үздік аяқтағаннан кейін, сот саласындағы еңбек жолын Павлодар
облыстық сотының мүшесі болудан бастап, судьялық мамандықтың қыр-сырын жете меңгере жүріп, айтарлықтай тәжірибе жинақтаған. Осы уақыт аралығында басқарушы партия органының ұсынысы бойынша елімізде заңның мүлтіксіз сақталуын қадағалаушы прокуратура органына ауысып, Павлодар қаласы прокурорының орынбасары, сол қаладағы Индустриальный ауданының прокуроры, Павлодар облыстық прокурорының бірінші орынбасары, Қазақ КСР-ы прокуратурасының бөлім бастығы болып абыройлы қызмет атқарған. Қазақстан Коммунистік партиясының Орталық комитетіне жұмысқа алынып, әкімшілік органдар бөліміндегі прокуратура, сот жүйесі және юстиция секторының меңгерушісі болған. 1984 жылдың наурыз айында Қазақ КСР-ы Жоғарғы Сотының төрағасы болып тағайындалып, 1993 жылға дейін осы қызметте болды. Одан кейін Пәкістан, Польша мемлекеттерінде елшілік қызмет атқарды. Бүгінгі таңда жастарға дәріс беріп, болашақ заңгер мамандарды дайындап білім саласында еңбек етіп жүр.