Рахымғали Абрарұлы Құл-Мұхаммед
Рахымғали Абрарұлы Құл-Мұхаммед 1967 жылы 26 наурызда Шығыс Қазақстан облысында дүниеге келген. Баспагер, философия ғылымдарының кандидаты, "Атамұра" корпорациясының президенті.
1994 жылы ҚазМУ-дың философия-экономика факультетін, 1998 жылы Абай атындағы Қазақтың Ұлттық педагогикалық университетінің заң факультетін тәмамдаған. 1994-1997 жылдары Қазақстан Республикасы Президенті әкімшілігінде жауапты қызмет атқарды. 1997 жылдан "Атамұра" корпорациясының бірінші вице-президенті, президенті болып қызмет атқарып келеді. 2000 жылы Қазақтың дәстүрлі ұлттық мәдени құндылықтарын зерделеп, кандидаттық диссертация қорғады. Бір монографияның және көптеген ғылыми, ғылыми-көпшілік мақалалардың авторы.
Рахымғали Құл-Мұхаммед "Атамұра" корпорациясының "Атамұра" Полиграфия комбинаты, "Атамұраторгснаб" жабдықтау кәсіпорны, "Атамұратранснаб" көлік мекемесі, жаңа буын оқулықтарының электрондық нұсқасын дайындайтын "IT Орталығының" қызметтерін үйлестіреді. "Атамұра" баспасынан шығатын жалпы білім беретін мектептерге арналған оқулықтар мен оқу-әдістемелік кешендерін әзірлеу, басып шығару және республика мектептеріне жеткізу жұмыстарын ұйымдастырады. Жас ғалымдар мен студенттерге, озат оқушыларға корпорацияның стипендияларын тағайындап, жыл сайын әдебиет пен өнер саласындағы үздік шығармаларға, білікті мамандарға ынталандыру сыйлықтарын табыс етеді. "Атамұраның" қазақ күресі, ұлттық айтыс өнерін жаңғырту және әлеуметтік-мәдени демеушілік ісшараларын жүзеге асырып отырады.
