Бауыржан Ниязұлы Құлжанов

Бауыржан Ниязұлы Құлжанов 1953 жылы 13 cәуірде Солтүстік Қазақстан облысында дүниеге келген. Омбы дене тәрбиесі мемлекеттік институтының жаттықтырушылар мектебін, Ресей кеден академиясын тәмамдаған. Қазақ күресінен Қазақстан Республикасының чемпионы. 1980 жылдан Солтүстік Қазақстан облыстық комсомол комитетінің спорттық-бұқаралық жұмыс бөлімінің меңгерушісі болды. Балалар арасында «Былғары доп», «Алтын шайба» жарыстарын өткізді. «Ақ бидай», «Солтүстік» ауыл-село спортшыларының мерекесін ұйымдастырушылардың бірі. 1990 жылдан «Динамо» ерікті спорт қоғамын басқарды. Бүгіндері облыстық күрес федерациясына жетекшілік етеді. Облыстық спорт ардагерлері кеңесі басқармасының мүшесі, қысқы Азия ойындарының алауын ұстау құрметіне ие болған.
Қажымұқан Мұңайтпасов, Жазылбек Қуанышбаев атындағы жүлделердің иегері. Солтүстік Қазақстан облысынан шыққан қазақша күрестен тұңғыш спорт шебері. Спорт қайраткері және Солтүстік Қазақстан облысының кеден қызметінің бірінші бастығы ретінде есімі облыстық энциклопедияға жазылған.