Әділжан Тұрсынбекұлы Үмбет
Әділжан Тұрсынбекұлы Үмбет, 1976 жылдың 17 қаңтарында Қызылорда облысы Жаңақорған ауданында Манап ауылында дүниеге келген. 1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Алматы қалалық «Алматы ақшамы» газетінің тілшісі (1996 жылдың қаңтар-қазан айлары), Қорқыт ата атындағы Қызылорда мемлекеттік университетінің баспа-редакциялық бөлімінің меңгерушісі (1996 жылдың қазаны – 1997 жылдың ақпаны), Қызылорда қалалық «Ақмешіт ақшамы» газетінің тілшісі (1997 жылдың ақпаны – 1998 жылдың қыркүйегі), Қызылорда облыстық «Сыр бойы» газетінің тілшісі, сектор меңгерушісі, бөлім басшысы, жауапты хатшының орынбасары, интернет-редакция бөлімінің жетекшісі (1998 жылдың қыркүйегінен). Негізгі қызметімен қосып республикалық «Жас Қазақ» газетінің (2006-2009), республикалық «Алаш айнасы» газетінің (2009 жылдан бастап) Қызылорда облысындағы меншікті тілшісі қызметін атқарды. Қазақстан Журналистер одағының мүшесі.
Әділжан Тұрсынбекұлы қазақ жеріндегі киелі, қастерлі, әрі тылсым дүниеге толы аймақтар туралы мәліметтерді жинақтап, оларды жариялап жүрген жан. Оның әр жылдарда бір ғана «Алаш айнасы» газетіндегі «Қазақ жерінің хикметтері» айдарына шыққан материалдарының өзі бір төбе.
