Қарағандыда бойжеткен 4-қабаттан құлап кетті
Қарағандыда көпқабатты үйлердің бірінде 4-қабаттағы балконнан бойжеткен құлап кетті. Ол комада жатыр, - деп хабарлайды Alashainasy.kz тілшісі "ҚазАқпарат"-қа сілтеме жасап.
Оқыс оқиға бүгін Гоголь көшесіндегі көпқабатты үйлердің бірінде болды. Шамамен 25 жастағы қыз 4-қабаттағы балконнан құлаған. Әлеуметтік желілерде куәгердің видеосы тарады. Кадрда дәрігерлер оны тексеріп, ауруханаға алып кетеді. Денсаулық сақтау басқармасынан оның жағдайы туралы түсініктеме берілді.
«Науқастың миына зақым келген. Ол комада жатыр», - деп хабарлады облыстық денсаулық сақтау басқармасының баспасөз қызметі.
Полиция жазатайым оқиғаның мән-жайын анықтап жатыр.
«Бұл дерек полицияда тіркелген. Қазір оқиғаның мән-жайы анықталып жатыр», - деп хабарлады Қарағанды облысы ПД баспасөз қызметі.
