Қазақстанда тұңғыш рет «Жұлдыздар айтысады» атты шоу-айтыс өтеді
Қазақстанда тұңғыш рет 14 желтоқсанда Астана қаласындағы Конгресс-Холлда, «Жұлдыздар айтысады!» атты шоу-айтыс өтеді. Тұңғыш рет эстрада жұлдыздары мен азулы ақындар жұптасып айтысады. Жобаның авторы «Әзіл әлемі» театрының актері Бақытжан Қасымов.
Жоба туралы Бақытжан Қасымов өзінің Instagram- дағы парақшасында хабарлады. «Жоба өте қызық болатын сияқты. Ақындар мен әншілер жұптасып айтысады. Жобаға қатысатын әншілердің ақындық өнерлерін тамашалайсыздар. Азуы алты қарыс ақындарға, көмекейіне бұлбұл ұя салған әншілерімізге сәттілік тілейміз және Болат Мажағұлов мырзаға зор алғыс. Қалғанын шоуда көрерсіздер . Тәуелсіздікке тарту болсын!», — деп жазды Б. Қасымов.
Елімізде тұңғыш рет өткізілгелі отырған жобаға Бекарыс Шойбеков, Айнұр Тұрсынбаева, Балғынбек Имашев, Серікзат Дүйсенғазин, Иранғайып Күзенбаев, Сара Тоқтамысова, Дидар Қамиев сияқты белгілі айтыскерлермен бірге, Роза Әлқожа, Қарақат Әбілдина, Қанат Әлжаппаров, Ұлықпан Жолдасов, Индира Расылхан, Жазира Байырбекова, Жанар Айжанова сынды танымал жұлдыздар қатысады.
