Қостанайда жоғалып кеткен 61 жастағы әйелдің жағдайы белгілі болды
Қостанайда жоғалған әйел қызметтік-іздестіру итінің көмегімен табылды, деп хабарлайды Bugin.kz порталы.
Polisia.kz сайтының мәліметінше, 3 наурызда таңертең "102" пультіне облыс тұрғыны 61 жастағы анасының жоғалып кеткені туралы хабарлады. Қызының айтуынша, оның есте сақтау қабілеті нашар , сондықтан үйге апаратын жолды таба алмайды.
Шақыруды қабылдағаннан кейін инспектор-кинолог Диас Игліков оқиға орнына барды. "Алладин" қызметтік-іздестіру итінің көмегімен іздеу жұмыстарын бастаған.
"Ит жоғалған әйелдің ізін бірден тапты. Біз жақын маңдағы аумақты және Пролетарская көшесінің бойымен 800-1000 метр радиуста айналып өттік. 39-ші үйдің жанынан жоғалған әйел табылды. Ол абдырап қалып, үйін таба алмаған. Сонымен қатар далада жүріп,жаурап қалған. Іздеу жұмыстары шамамен бір сағатқа жуық уақытқа созылды", - деді полиция сержанты.
Диас Игліков полицияда 2019 жылдан бері жұмыс істейді. Осы уақыт ішінде ол жоғалған адамдарды іздеуге бірнеше рет қатысты. Қызметтік иттің көмегімен жоғалған үш адам табылды.
