Зейнеткер замандасын не үшін атып өлтіргенін айтты – Екібастұз
Екібастұзда өз замандасын атып өлтірген зейнеткердің қанды қылмысқа не үшін барғаны белгілі болды. Тәртіп сақшыларының мәліметінше, 65 жастағы күдікті мен марқұмның бұрыннан бас араздығы бар екен.
Жасқайрат Қайыров, Павлодар облыстық ПД бастығының орынбасары: - Ауыр қылмыс жасады деген күдікті, 65 жастағы зейнеткер мен марқұм ескі таныстар болып шықты. Олардың арасында бұрыннан келіспеушілік болып, бір-бірін өлердей жек көрген. Күдіктінің қылмысқа баруына да сол бітпес дау себеп болған.
Бірақ екеуінің не үшін жанжалдасып жүргенін полицейлер ашып айтпады. Белгілісі, олар жиі ерегесетін болған. Ал оның соңы кек алумен аяқталған.
Қайғылы жағдай үш күн бұрын Екібастұз қаласында болған. Бастан аяқ қара киінген күдікті қоқыс тастап қайтып келе жатқан танысын шолақ мылтықпен екі рет атып өлтірген. Жұртың көзінше адам өлтірген азамат оқиға орнынан із суытқанымен, бір тәуліке жетпей қолға түсті. Оның қылмыс жасаған қаруы да тәркіленген. Қазір ол тергеу қапасында.
