Тосын оқиға бүгін таңертең орын алған. Қала тұрғыны облыс орталығындағы Әл-Фараби аудандық ішкі істер бөліміне белгісіз біреулердің тонап кеткенін айтып шағымданған. Жәбірленуші 08:00 шамасында ақша айырбастау пунктін ашып, ішінде тазалау жұмыстарын жүргізіп жатқан. Бейқам тұрған жанды сол кезде артынан байқатпай келген белгісіз екі азамат ішке қарай итеріп жіберіп, бар ақшаны алып, іздерін жасырып үлгерген. Оқиға орнына шұғыл жеткен тәртіп сақшылары ақша айырбастау пунктінде ешқандай қауіпсіздік шараларының сақталмағанын анықтаған. Дабыл қағатын тетік пен бақылау камерасы, тіпті ақша сақтайтын сейфі де болмаған. Қазіргі таңда қолды болған қаржы көлемі мен күдіктілерді іздеу шаралары жүргізіліп жатыр. «Орталық көшелердің бірінде орын алған іске қатысты «Тонау» дерегі бойынша қылмыстық іс қозғалды», - дейді ОҚО ІІД Мемлекеттік тіл және ақпарат басқармасының басшысы Салтанат Қаракөзова.
24.kz