Биыл есірткі саудалайтын 604 сайт жабылған
Биыл елімізде 604 есірткі сайты жабылған. Үкімет отырысында Ішкі істер министрі Марат Ахметжанов осылай деді, деп хабарлайды ҚазАқпарат тілшісі.
«Есірткі бизнесі де толығымен кибер салаға көшті. «Телеграм-боттар немесе басқа да интернет ресурстар арқылы сату кеңінен тарап жатыр. Мысалы, биыл тіркелген әрбір жетінші есірткі қылмысы интернет арқылы сатумен байланысты. Әрине, біз мұндай бүркеншік интернет-дүкендерді жауып жатырмыз. Биыл 604 есірткі сайтын жаптық», - деді ол.
Министрдің айтуына қарағанда, бұл шара мәселені түбегейлі шешпейді. Мұндай заңсыз контентті тоқтату үшін министрлік «Аргус», «Айрис», «Тритон» сияқты заманауи аппараттық-бағдарламалық жабдықтар сатып алмақшы.
«Олар – әлеуметтік желілер немесе сайттар арқылы есірткінің таралуын анықтауды автоматтандыруға мүмкіндік береді. Сондай-ақ «Киберқадағалау» жүйесі мұндай сайттар ашылса, оларды онлайн түрде бұғаттайды. Яғни, жасанды интеллект өзі анықтап, дереу тосқауыл қояды. Сонымен қатар сайтты ұйымдастыратын және оны пайдаланатын адамдарды анықтауға мүмкіндік болады», - деді Ішкі істер министрі.
