Атырауда 7 жастағы ұл бала туысынан зәбір көрді, - деп хабарлайды Alashainasy.kz. Бұл туралы sputnik.kz тілшісі "Немолчи" қоғамдық қорына сілтеме жасап жазды.
Қордың мәліметінше, жеткіншекті өгей әкесінің ағасы сексуалдық қатынасқа мәжбүрлеген. Туысының қандай әрекет жасағаны туралы көрсетіп, түсіндіріп берген баланың жаға ұстатарлық бейнежазбасын анасы қоғамдық қорға жіберген.
Әйел бұған дейін де қайын жұртынан әлімжеттік көріп келген. Туыстары мен күйеуі үнемі ұрып-соққан. Тіпті әйел жүкті кезінде де осындай агрессияға тап болған.
Мұндай азапқа шыдамаған әйел суицид жасамақ болған. Абырой болғанда дәрігерлер аман алып қалған. Бала болған оқиғаны айтуға қорыққан. Бірақ келіншек бір сұмдықтың болғанын сезіп, үйінен қашып, полицияға арыз берген.
Атырау облысының полиция департаменті баспасөз қызметі Sputnik Қазақстан тілшісіне осы жағдайға қатысты арыз түскенін растады. Алайда сот санкциясы болмағандықтан күдікті әлі күнге қамауға алынбапты.
"Тергеу басқармасы "Көрінеу жас балаға қатысты күш қолданбай азғындық әрекеттер жасау" бабы бойынша сотқа дейінгі тергеу амалдарын жүргізіп жатыр. Сот-медициналық сараптама тағайындалды. Сот санкция берген жоқ, сол себепті күдікті қамауға алынған жоқ. Өзге ақпарат ҚР ҚПК-нің 201-бабына сәйкес жария етілмейді", - деп мәлімдеді облыстық ПД баспасөз қызметі.