Жұмысқа шықсам, жәрдемақы тоқтатыла ма?

Бала бір жасқа толғанға дейінгі берілетін жәрдемақыға құжат тапсырайын десем, «декреттік демалыс біткенше құжаттар қабыл­да­май­­мыз немесе жұмыс орнынан ары қарай бала күтіміндегі ақысыз дема­­лыс­қа кеткеніңіз туралы бұйрық алып келіңіз» дейді. Осы талап заң­ды ма? Егер бала туылғаннан кейін екі-үш айдан соң жұмысқа шы­ғып кетсем, онда бала бір жасқа толғанға дейін төленетін жәрдемақы тоқ­татыла ма?
Шырайгүл ӨМІРЗАҚОВА, Алматы облысы
Сарапшы маманның айтуына қара­ғанда, «Міндетті әлеуметтік сақтандыру туралы» ҚР Заңына (бұдан әрі – Заң) сәйкес, бала бiр жасқа толғанға дейiн оның күтiмiне байланысты табысынан айы­рылған жағдайда төленетiн әлеу­меттiк төлемдi (бұдан әрі – ӘТбк) тағайын­дау үшiн сіз бала туылған күннен бастап 12 ай ішінде тұрғылықты жеріңіз бойынша Зейнетақы төлеу жөнін­дегі мемлекеттік орталықтың бө­лім­шесіне барып, қажетті құжаттармен қо­са өтiнiш білдіре аласыз.
Заңның 23-2-бабының 3-тармағына сәй­кес, ӘТбк тағайындау үшін қажетті құжат­тардың бірі болып бала күтіміне байланысты жалақысы сақталмайтын демалыста екендігі туралы жұмыс беру­ші бұйрығының үзінді көшірмесі (бала 1 жасқа толғанға дейін оның күтіміне байланысты табысынан айырылу фак­тісін растайтын құжат) табылады.
Сондықтан ӘТбк тағайындау үшін Заң­мен белгіленген құжаттар тізімі ұсынылуы қажет.
Заңның 23-2-бабының 4-тармағына сәйкес, Әтбк баланың туу туралы куәлi­гiн­де көрсетiлген туған күнiнен бастап ол 1 жасқа толған күндi қоса алғандағы мерзімге дейiн тағайындалады.