Жеке куәліктің суретін жеке фотографтарға түсіруге болмайды

Өткенде Әуезов аудандық халыққа қызмет көрсету орталығына барып, жеке куәлікті жаңартуға құжат өткіздім. Олар «3,5 *4,5 суретке түсуің керек» дейді. Мен өзім фотографпын. Суретті дәл солардың көлеміне сәйкес берсем, олар қабылдамай отыр. «Біздің фотографқа түсуіңіз керек» дейді. Жалпы, осы заңды ма, әлде заңсыз ба?
Нұрғиса ЕЛЕУБЕКОВ, Алматы қаласы
Алмас МАХАМБЕТОВ, Әуезов аудандық әді­лет басқармасы құжаттандыру және тіркеу бөлімінің бастығы:
– Бұл заңды. Өйткені біз қазір электрондық жүйеге көшіп жатырмыз. Бұрынғыдай қағаз жүзіндегі құжаттар жинау енді тоқтатыла бастайды. Оның заманы өтті. Қазір өзіміздің электронды фотоаппаратымыз бар. Егер бізден түссеңіз, ол компьютер арқылы бірден құжат шығаратын зауыттың тіркеуінде тұрады. Онымен қоса электронды қол қоятын қаламсабы­мыз бар. Оның барлығы да компьютерге түсіп, ор­талықтандырылған базаға жиналады. Егер орнынан тұра алмайтын, жүре алмайтын мүгедек адамдар болса, олардың құжаттарын бұрынғыдай қағаз жүзінде қабылдаймыз. Оларды жеке фотографтар суретке түсіріп, туыстары қолын қойғызып, өздері бізге алып келеді. Біз сол бойынша қабылдаймыз. Бірақ ол элек­тронды базада сақталмайды.