Зейнеткермен еңбек шартын тоқтатуға бола ма?

Мен мемлекеттік кәсіпорында мамандарды бақылаушы инспектор болып қызмет атқарамын. Кәсіпорында зейнеткерлік жасқа жеткен күзетші жұмыс істейді. ҚР Еңбек кодексінің 240-бабы, 1-тармағы зейнеткерлік жасқа жеткен жұмыскермен еңбек шартын тоқтатудың қосымша негізі болып табылады делінген. Осы тармақты негізге ала отырып, жұмыскермен еңбек шартын тоқтатуға бола ма?
Аида ӘМІРХАН, Жамбыл облысы
ҚР Еңбек кодексінің 240-бабына сәйкес, қыз­меткерлермен еңбек шартын тоқтату үшiн осы кодексте белгiленген негiздермен қатар, азаматтық қыз­метшiлердiң Қазақстан Республикасының за­ңында белгiленген зейнеткерлiк жасқа жетуi олармен еңбек шартын тоқтатудың қосымша негiзi болып табылады.
Бұл ретте, Қазақстан Республикасы Үкі­ме­тінің 2007 жылғы 27 қыркүйектегі № 850 қау­лы­сымен бекітілген Азаматтық қызметшілер лауа­зым­да­рының тізбесінде күзетші (сторож) лауазымы енгі­зілмеген. Тек қана күзет қызметкері (охранник) қыз­метші лауазымы көзделген. Яғни кү­зетшілер аза­маттық қызметшілер санатына жатпайды.
Сондықтан оларға қатысты 240-бабының нормалары қолданылмайды.