Жаңа сериал не жайында?
24 қаңтардан бастап «Қазақстан» ұлттық телеарнасынан «Әке серті» атты жаңа сериал беріле бастайтын көрінеді. Сериалды кім түсірген, қандай актерлер қатысқан?
Айша ҚАНАТҚЫЗЫ, Алматы
«Қазақстан» РТРК АҚ-ның тапсырысымен «3 TA Pictures» компаниясы «Әке серті» деп аталатын телехикая түсірді. Бұл жоба қазақ-түрік мамандарының бірлесіп жасаған алғашқы көркем туындысы болып отыр. Жобаның мақсаты – бір жылда жүздеген телехикая түсіріп, біршама жетістіктерге жеткен түрік мамандарымен бірлесе жұмыс істеу арқылы отандық телеөндіріске жаңаша бір леп қосу. Рөлдерді қазақ актерлері Сағат Жылгелдиев, Гүлшарат Жұбаева, Мақсат Сәбитов, Гүлшат Тұтова, Әсет Иманғалиев, Қадірбек Демесін, Болат Әбділманов т.б. орындайды.
Актерлер кәсіби шеберлігіне қарап іріктелген.
«Әке серті» телехикаясы өзге телетуындылардан сюжет желісінің өміршеңдігімен және көкейкестілігімен ерекшеленеді. Әке мен балалар арасындағы байланыс, жақсы мен жаман, ақ пен қара, қуаныш пен қайғы арасындағы жік пен көзге көрінбес байланыс – мәңгілік тақырып. Телехикаяға Мұхтар Шахановтың сөзіне жазылған Нұрғиса Тілендиевтің «Әке туралы жыр» әні тандап алынған. Әнді жаңаша бағытта өңдеп, әрлеген – Нұрлан Қаражігітов. Ал «Әке туралы жыр» әнін орындаған – С.Қаражігітова.
