Ұлттық дельфий ойындары қашан басталады?
Қазақстанда жыл сайын дарынды жастар арасында «Дельфий ойындары» байқауы өтетіні белгілі. Биылғы шара қай кезде және қай қалада ұйымдастырылмақ?
Берік Дәуренұлы, Алматы облысы
Бұл жолы дәстүрлі дельфий ойындары ағымдағы жылдың 21-25 қараша күндері Алматы қаласында «Ұлттық нақышта!» ұранымен өткізіледі.
Биыл тоғызыншы рет өткелі отырған Ұлттық дельфий ойындарына еліміздің 500-ден аса талантты жастары екі кезеңнен тұратын сайысқа қатыспақ.
Шараны ұйымдастыру комитетінің мәліметінше, аталған жоба Қазақстанда 2005 жылдан бері қолға алынып келеді. Бұл жобаға қатысуға ниетті талантты жастардың да қатары жыл сайын өсуде.
Дельфий ойындары алдымен еліміздің әр өңірінде өткізіліп, аймақтардың жеңімпаздары республикалық байқауда бақ сынайды.
Сайыс жеңімпаздары 2014 жылы Бішкекте өтетін халықаралық дельфий ойындарына қатысу мүмкіндігіне ие болады.
Ойындардағы барлығы 16 номинацияның ішіне музыка, ұлттық қолөнер және басқа да классикалық және қазіргі заман жанрлары кіреді.Ұлттық дельфий ойындарының ұйымдастырушылары ҚР Білім және ғылым министрлігінің тарапынан қолдау тапты. Бас демеушісі – «Самұрық-Қазына» қоры.
