Үй жағдайында тұмауға қарсы қандай ем қолдануға болады?

Қазір балалар арасында тұмау көп. Осы орайда менің білгім келгені – бала тұмаумен ауырғанда үй жағдайында қандай емдік шөптерді пайдалануға болады?
Айжамал БЕКЕНТАЕВ, Жамбыл облысы
М.Ш.ЖАНСЕИТОВА, МСЭҚД Бостандық ауданы бойынша басқармасының маманы:
– Балалар тұмаумен ауырғанда үй жағда­йын­да мынадай ем қолдануға болады:
1) Усойқы (волчник) шөбінің қабығынан 6-7 см бөлшегін алып, 50-60 мл-дай ет сорпа­сы­на қосып, бір минуттай қайнатып, жылылай ішкізу керек. Қай­натылған сұйықтықты үлкен­дер бір-ақ ішеді. Ал ба­лаларға жартылай, яғни 25-30 мл-дай ішкізу қа­жет. Сол қабықты екінші рет 6-7 минут сол мөл­шердегі, яғни 50-60 мл сор­паға қайнатып  қайта ішкізуге бо­ла­ды. Ол денедегі суықты шыға­рып, уытты қайта­рады. Асқа­занның жұмыс істеу қабі­летін арт­тырады. Осы емдеу әдісін 3 күн қатарынан қайталаса, нау­қас тұмау­дың қандай түрінен болсын сауы­ғып кетеді.
2) Өгейшөп жапырағының 1 ас қасығын, таңқу­рай жапырағының 2 ас қасығын 500 мл суға 3-4 минут қайнатып, 40 минут тұндырып, жарты кеседен күніне 3 рет ішкізу керек. Емделу мерзімі 7 күн.
3) Бір кесе қайнаған суға 1 шай қасық тұзды араластырып, ерітіп, жылылай мұрынға тартады немесе мұрынның ішін жууға да болады.
4) Шай демдейтін кішкентай шәйнекке су қайнатып, бір ас қасық балды араластырып ері­теді. Будың ыстығы сәл басылған соң шәйнектің қақпағын жақсылап жауып, шүмегінен шыққан буды түтік арқылы жұтады. Сонымен дем алды­рады. Су суып қалса, қайта қыздырады. Бумен дем алу 15-20 минутке созылады. Бумен емдеу кезінде тыныс жолдарын күйдіріп алудан сақта­ну керек.
5) 4-5 грамм сабырды (алоэ) мұзқантпен, яғни набатпен қосып, 100 мл суға қайнатып, кү­ні­не 3-4-ке бөліп ішкізу қажет. Емделу мерзімі 5 күн.
Тұмау қатты болса, жас балаларға гамма-глобу­лин еккізу қажет. Гамма-глобулинде  түрлі тұмау қоздырғыштарына (вирустарына) қарсы тұра­тын анти­денелер бар. Тұмауды үйде емдеген­де антиг­рип­пин, ремантадин, интерферон және оксолин майын пайдалану керек.