Тұрғын үйді дүкен қылу үшін көршілерден рұқсат алу қажет пе?
Жақында мен қаланың ортасынан үш бөлмелі пәтер сатып алдым. Енді оны қайта өңдеп, бір бөлмесін дүкен қылсам ба деп едім. Бұл үшін не істеуім керек, бұлай жасау үшін көршілерден рұқсат алу қажет пе?
Замира, Талдықорған қаласы
Алматы облыстық мемлекеттік сәулет-құрылыс бақылау департаменті мамандарының айтуынша, тұрғын үйді толықтай немесе бір бөлігін өзгерту оның бұзылуына, бүлінуіне, басқа тұрғындардың тұру жағдайларын бұзбауға, қоршаған ортаға залал келтірмеуі тиісті екен. «Тұрғын үй қатынастары туралы» Заңның 4-бабы, 3-тармағына сәйкес, тұрғын үйді өзгерту үй-жай иесінің келісімімен және жобаның құрылыс нормалары мен ережелерiне сәйкес келуiне жауап беретiн заңды немесе жеке тұлға орындаған жоба болған жағдайда ғана жүзеге асыруға болады. Жобаның мiндеттi талаптарға сәйкестiгiн ҚР заңдарында белгiленген тәртiппен сәулет, қала құрылысы және құрылыс iстерi жөнiндегi уәкiлеттi мемлекеттiк орган растайды. Егер үй-жайларды қайта жабдықтау кезінде басқа меншiк иелерiнiң мүдделерiн қозғайтын жағдайда олардың алдын-ала жазбаша келiсiмi талап етiледi. «Тұрғын үй қатынастары туралы» Заңның 2-бабы 17-тармағына сәйкес, үй-жайларды (пәтерлерді) өзгерткен кезде меншік иелерінің жалпы санының кемінде үштен екісінің міндетті жазбаша келісімі мынадай: өзгерістер тіреуіш конструкцияларды қозғаған; өзгерістер ортақ мүлікті қозғаған жағдайларда талап етіледі. Жоғарыда аталған өзгерістер өзгертілетін үй-жайлармен (үй бөліктерімен) жапсарлас басқа да үй-жайлар (үй бөліктері) меншік иелерінің ғана мүдделерін қозғаған жағдайда, тек аталған адамдардың ғана жазбаша келісімін алу талап етіледі.
