Төлқұжатта күлімсіреуге бола ма?

Бір қызығы, төлқұжат суретінде адамдардың барлығы тымырайып тұрады. Күлімсіреуге қатаң тыйым салына ма? Сондай-ақ суретке түсу барысында тағы неге тыйым салынады?
Ағайша, Астана қаласы
Құжатта күлімсіреуге болмайды деген ой біздің санамызға сіңіп қал­ғаны соншалық, біз автоматты түрде суретке түсерде қатаң кейіпке енеміз. Әйтпесе төлқұжатқа суретке езу тартып, күлімсіреп түсуге бол­майды деген ешқандай қатаң талап жоқ.
Жалпы, ереже бойынша төлқұжат суретіне баскиіммен және көзілдірік­пен түсуге болмайды. Тек соңғы кезде діни сенімге байланысты орамалда т.с.с. баскиімде түсуге рұқ­сат етілді. Қазіргі кезде суретті фотошоппен өңдеудің белең алуына байланысты паспорт суретін фото­шоппен өңдеуге тыйым салынды. Себебі өңдеу кезінде адамның ерекше белгілері (мең, қал, тыртық т.б.) өшіп қалса, төлқұжат жарамсыз болып шыға келеді.