Табыл туған жер қайда?

«Біздің қырда қыдырса егер бір жаздай, Талай ақын кетер ме еді жыр жазбай» деп жырлаған ақын Табылды Досымовтың туып-өскен жері туралы білгім келеді.
Нұрбек, Тараз қаласы
Табылды Досымов – Индер ауда­нының тумасы. Аудан 1933 жылы құрылған. Аудан орталығы Атырау қаласынан қашықтығы 190 шаршы шақырым жердегі Индербор кентінде орналасқан. Халқы сирек орналас­қан ауданда  бір кент, төрт селолық округ, екі ауылдық округ бар.
Географиялық орналасуы жағы­нан Ин­дер ауданы Атырау облысының теріскейін­де, Каспий маңы ойпаты­ның орта тұсында, Жайық өзенінің екі жағалауын бойлай орналасқан. Шығы­сы мен түстігінде облыс­тың Қызылқоға, Махамбет аудандары­мен, батысы мен терістігінде Батыс Қазақстан облысының Жаңа қала, Ақжайық аудан­дарымен шектеседі. Ауданның жер көлемі – 11.1 мың шар­шы шақырым. Жер бедері негізі­нен жусанды жазық далалық болып келеді. Сондай-ақ тұйықталған қуыстар, құлама сайлар, сорлар кездеседі. Сайлар­дың терең еместері де, бірнеше шақырым­дық алқапты алып жатқандары да бар. Бұл өлкеде жаз айларында кеуіп, соры шығып жататын бірнеше тұзды көлдер бар.
Мұнда Индер күмбезі деп аталатын дөңесті жер бар. Оның батыс жағы етегін­де Жайық өзенінің аңғары, ал оңтүстігінде Индер тұз­ды көлі бар. Онша биік емес дөңес­тер түстік батысында Оңдасын жалы­мен, терістігінде Тотжалмен, шығы­сында Көктаумен ұштасады. Бұл аумақта қазанға ұқсас жүздеген шұңқыр бар. Терең құдық­тар, үлкен­ді-кішілі үңгір­лер, жыралар кез­деседі.