«Шпигель» – сюжеттің аңдатпасы
Телеарнада жұмыс істейтін таныстарымнан «стенд-ап», «синхрон», «шапка» деген сөздерді жиі естуші едім, 
жақында «шпигель» деген терминді құлағым шалып қалды. Бұл журналистер пайдаланатын құрал-жабдық па?
Бибігүл СЕРІКҚЫЗЫ, Алматы
«Шпигель» неміс тілінде «айна» деген мағынаны білдіреді. Телевизия тілінде «шпигель» деп жаңалықтар топтамасындағы алда болатын сюжеттің қысқаша аңдатпасын айтады. Байқаған болсаңыздар, қазір телеарналардың басым бөлігі жаңалықтар шығарылымының басында көрсетілетін сюжеттерге алдын ала қысқаша тоқталып, аңдатпа береді. Сол аңдатпаларда диктор көрермендермен сәлемдескен соң, «бүгінгі жаңалықтарымыздан көретіндеріңіз», – деп әр репортаж авторына сөз береді. Журналистер үшін «шпигель» сюжеттің ең маңызды бөлігі болып саналады. Себебі мұнда әр тілші өз сюжетінің басқасынан ерекше екенін дәлелдейтіндей етіп жарнамалауы тиіс. Ал бұл үшін аз уақыт кетпейтіні белгілі. Кейде «шпигель» стенд-аппен, яғни тілшінің кадрдегі қысқаша сөзімен де жасалады.
