Семейде таэквондодан халықаралық турнир өтті
Жақында Семейде таэквондодан халықаралық турнир өтті деп естідім. Оған қай елдер қатысты? Жалпы, қай өңірдің спортшылары жеңіске жетті?
Асан Мырзаханов, Семей қаласы
Семейде таэквондодан қала кубогы сарапқа салынған халықаралық турнир өтті. Осымен 15-інші рет ұйымдастырылып отырған дүбірлі доданың бағдарламасы бойынша спортшылар спарринг, техниканы көрсету және өзін-өзі қорғау сындарында шеберлік байқасты.
Жалпы, биыл турнирге Ресейдің Омск, Новосібір, Бурятия жерлерінен, Тәжікстаннан, Моңғолияның Баян-Өлгей аймағынан, Қазақстанның Алматы, Шымкент, Теміртау, Қызылжар, Өскемен, Теміртау және Семей қалаларынан 600-ге жуық спортшы қатысты.
Екі күнге созылған халықаралық доданың қорытындысы бойынша турнир қожайындары жеңімпаз атанса, жүлделі екінші орынды Қарағанды таэквондошылары иеленді. Екібастұз қаласы үздік үштікте.
ШҚО таэквондо федерациясының президенті Махаббат Советханның айтуынша, таэквондодан Семей кубогы 1998 жылдан бері ұйымдастырылып келеді екен. Содан бері дәстүрлі түрде өтіп келе жатқан турнирде әрдайым Шығыс Қазақстан облысының спортшылары бас жүлдені еншілеп келеді. Енді осы турнирдің үздіктері келесі жылы Алматы қаласында өтетін Қазақстан Чемпионатында бақтарын сынамақ.
