Шәмшінің қанша әні бар?
Жалпы Шәмші әндерінің концерті жиі өткізіледі. Бірақ атақты композитордың қанша әні бар екен білмейді екенмін. Осыны нақтылап берсеңіздер?
Әлібек Қуанбай, Алматы қаласы
Мұхтар Әуезов «Ақан, Біржан өнерпаздығынан кейінгі бір «жыл келгендей жаңалық» сезіндіретін үздік құбылыс» деп бағалаған Шәмші әндері өткен ғасырдың 60-70-шi жылдарындағы жастардың аузында жүріп, сол кездің өзінде-ақ «Вальс королі» атанды. Аса көрнекті сазгер, Қазақстан мәдениетіне еңбегі сіңген қайраткер, осы заманғы қазақ эстрадасының негізін салушылардың бірі, Қазақстанның халық әртісі Шәмші Қалдаяқов 1930 жылы Оңтүстік Қазақстан облысының Қызылқұм ауданында дүниеге келді. 1956-1962 жылдары Құрманғазы атындағы мемлекеттік консерваторияда В.В.Великанов класында оқыды. Ғажайып саздылығымен, сылдырап аққан бұлақ суындай тап-таза сыңғырымен, лирикалық наздылығымен ерекшеленген сазгерге берілген баға сол – жұрт аузында «бүкіл қазақ еліне ән салдырған Шәмші» атанды.
Халық арасында, әсіресе күллі отаншылдық, елшілдік нотасын тап басқан «Менің Қазақстаным» туындысы 2005 жылдан бері Қазақстан Республикасының Мемлекеттік Гимнi болып бекітілген Шәмші Қалдаяқовтың 300-ден аса әні бар. Дегенмен бүгінде сазгердің әндері зерттеліп, біртіндеп жарық көріп жатқандары да бар.
