Сағыз адамның ақылын азайтады
Қазіргі күні сағыздардың неше түрі шығып жатыр. Сонымен бірге бұл ең өтімді тауар түріне айналып отыр. Әсіресе, жастар оны шайнауға құмар-ақ. Сұрайын дегенім, сағыздың адам ақыл-ойына пайдасы немесе зияны бар ма?
Әсет ТӨЛЕНОВ, Алматы қаласы
Осыдан бірнеше уақыт бұрын америкалық ғалымдар сағыздың ағзаға қалай әсер ететінін зерттеп көріпті. Олар үнемі сағыз шайнайтын 12-24 жас аралығындағы 12 мың жас пен мүлде шайнамайтын осынша адамды бақылауға алған. Қорытынды зерттеушілердің өздерін де таңғалдырыпты: үнемі сағыз шайнаушылардың ақылдары төмен болып шыққан. Өйткені сағыз шайнағанда адамның миы тынышталып, шайнамайтындарға қарағанда келген ақпараттарды жай, сүлесоқ қабылдайды екен. Ал сағыз адамды біртіндеп темекі сияқты өзіне тәуелді етіп алатыны соншалық – ашу қысқан кезде немесе шаршаған сайын шайнағысы келіп тұратын көрінеді.Тағы бір ескерте кететіні – оны тіс пастасының орнына пайдалануға болмайды. Сағыз тамақ қалдықтарынан тек тістің үстіңгі жағын ғана тазартады, бірақ ара-арасын толық тазартпайды. Оны тамақтан соң 10 минут шайнасаңыз жетіп жатыр. Ал одан артық шайнау жақты шаршатып, асқазандағы сөлдің қалыптан тыс көп бөлінуіне, ал мидың жай жұмыс істеуіне себеп болады. Былайша айтқанда, адам ақылсыз бола бастайды.
