Рақымшылық жасала ма?

Сіздерден өтінерім, үстіміздегі жылдың 16 желтоқсанында, яғни Тәуелсіздік күніне орай елде амнистия жариялана ма, жоқ па, соның анық-қанығын біліп берсеңіздер екен?
Әсем НҰРМОЛДИНА, Қарағанды қаласы

Құрметті Әсем, сіздің сауалыңызға қатысты құзырлы министрлік былай деп хабарлайды:
Бір айта кетерлігі, Қазақстан Республикасы Конституциясының (бұдан әрі – Конституция) 61-бабы 1-тармағына сәйкес, заң шығару бас­та­масы құқығы Республика Президентіне, Пар­ламент депутаттарына, Үкіметке тиесілі және тек қана Мәжілісте жүзеге асырылады. Консти­туцияның 54-бабы 1-тармағы 6-тар­мақ­шасына сәйкес, Пар­ла­мент палаталардың бөлек отырысында мәсе­лелерді әуелі – Мәжілісте, ал содан кейін Сенатта өз кезегімен қарау арқылы рақымшылық жасау мәселелерін шешеді. Қаза­қ­­стан Республикасының Қылмыс­тық кодексiнің 76-бабының 2-тармағына сәйкес, ауыр немесе аса ауыр қылмыстар жаса­ғандар мен қылмыс­тардың қауiптi немесе аса қауiптi қайталануы жағдайында жаза таға­йын­далған адамдарға рақымшылық жасау туралы акт қолданыл­май­ды.
Қазақстан Республикасының «Нормативтiк құқықтық актiлер туралы» Заңының 30-бабы 1-тармағына сәйкес барлық заңдар алдын ала жарияланатын болады. Демек, рақымшылық жасау туралы акт қабылданған жағдайда Қаза­қ­стан Республикасының барлық азамат­тары оның мазмұнын баспасөз беттерінен оқи алады.