Қыздар Олимпиада ойындарына алғаш рет қай жылы қатысқан?

Бүгінде спортты қыздарсыз елестете алмаймыз. Менің білгім келетіні, қашаннан бері нәзікжандылар Олимпиада ойындарына қатыса бастады?
Айнұр Иманғалиева, Алматы қаласы
Антикалық дәуірдегі Олимпиада ойын­да­ры­на қыздар мүлдем қатыспаған. Тіпті нә­зік­жанды­ларға спорт түрлерін тамашалау­дың өзі тыйым салынған еді. Спорт тек ер­лердің ға­на айналыса­тын өнері саналған. Сол кездегі қағидат бойын­ша, егер Олим­пиада кезінде трибунадан әйел затын көріп қалса, оны құзға лақтырып жіберіп отырған. Тек бертін келе ғана қыздар да спорт­пен ай­налыса бастады.
1896 жылғы бірінші Олимпиада ойында­ры да арулардың қатысуынсыз өткен. Де­ген­мен ойындарды тамашалаған қыздардың саны өте көп еді. Ал 1900 жылы Парижде өт­кен екінші жазғы Олимпиада ойындары алғаш рет қыздар­дың тікелей қатысуымен өткен. Нақты айтсақ, Франция астанасына әлемнің 24 елінен 997 спорт­шы келген бол­са, соның 22-сі арулар болған екен. Сол кез­де әйелдер арасында тен­нис, крокет, ат спор­ты, желкенді қайық спорты және гольф­тан медальдар жиынтығы сарапқа салынды.