Құрылтайшылар тізімінен қалай шығуға болады?

Мен түрік-қазақ бірлескен кәсіпорынына бір пайыздық үлеспен құрылтайшы болған едім. Бірақ ол кәсіпорын бірнеше жыл бұрын жұмысын тоқтатқан. Алайда кәсіпорынның салық­тық қарыздары қалған екен. Енді сол қарыздар менің алдымнан шығып отыр. Құрыл­тай­шылардың тізімінен шығайын деп сотқа арыз берсем, «қалған құрылтайшылардың келі­сі­мі керек» дейді. Әділет органы арқылы құрылтайшылар тізімінен шығуыма бола ма?
Зульфия ХАЙРУЛЛИНА, Атырау облысы
Әділет органы маманының мәліметіне қара­ғанда, әділет органдары өз құзыреті шегінде заңды тұлғаның құрылу, қайта тіркелу, құрылтай құжаттарына енгізілген өзгерістер мен толықты­рулардың тіркелу, қайта ұйымдастырылу және қызметінің тоқтатылу фактiсiн куәландырады. «Жауап­кершілігі шектеулі және қосымша жауап­кер­шілігі бар серіктестіктер туралы» Заңының 43-бабына сәйкес, серіктестіктің жарғылық капи­та­лы мөлшерін, орналасқан жері мен фирмалық атауын өзгертуді қоса алғанда, оның жарғысын өзгерту немесе серіктестіктің жаңа редакциядағы жарғысын бекіту туралы сұрақ­тар­ды шешу жауапкершілігі шектеулі серіктес­тіктің (бұдан әрі – ЖШС) жалпы жиналысының ерекше құзыретіне жатады. Тіркеуші орган құрылтай құжаттарын тіркеу рәсімінен өткізген­нен кейін сараптама жасайды. Ал құрылтай­шылар құрамынан шығуға қатысты мәселелері тіркеуші органның құзыретіне жатпайды.
Сонымен қатар Қазақстан Республика­сының Азаматтық іс жүргізу кодексінің (бұдан әрі – Кодекс) 8-бабына сәйкес, әрбір адам бұзылған немесе даулы конс­титуциялық құқықтарын, бостандықтарын немесе заңмен қорғалатын мүдделерін қорғау үшін сотқа жүгінуге құқылы. Кодекстің 298-бабына сәйкес, судья істі соттың қарауына әзірлеу кезінде қандай адамдардың жоқ адам туралы мәлімет бере алатынын анықтайды, сондай-ақ жоқ адам туралы соңғы мәлім болған тұрғы­лық­ты жері және жұмыс орны бойынша тиісті ұйымдардан ол туралы бар мәлі­меттерді сұрауға құқылы.