Қосымша жұмыс үшін ақы қалай төленеді?

Менің білімім жоғары. Мемлекеттік мекемеде нұсқаушы болып жұмыс істеймін. Және оған қосымша жүргізуші қызметін де атқарамын. Алайда маған қосымша жұмыс үшін негізгі қызметім – нұсқаушының жалақысынан емес, жүргізуші жалақысынан 30 пайыз қосымша ақы төлеп отыр. Жүргізушінің жалақысы нұсқаушының жалақысынан аз. Осы дұрыс па?
Мәдибек ТӨЛЕШОВ, Ақмола облысы
Қазақстан Республикасы Еңбек және халықты әлеуметтік қорғау министрлігінің сарапшы маманының мәліметінше, азаматтық қызметшілерге еңбекақы төлеу «Азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі туралы» Қазақстан Республикасы Үкіметінің 2007 жылғы 29 желтоқсандағы №1400 қаулысымен (бұдан әрі – Қаулы) реттеледі.
Қаулыға 19-қосымшада мамандарға, қызметшілерге және жұмысшыларға лауазымдарды қоса қызмет атқарғаны (қызметтер көрсету аясы кеңігені) үшін қызметкердің лауазымдық жалақысынан 50 %-ға дейінгі мөлшерде қосымша ақы белгіленген (яғни негізгі лауазымдық жалақыдан).