Қазір параның орташа көлемі қанша?

Елімізде жемқорлық деректері тыйылмай тұр ғой. Бұл қылмыс қалыпты құбылыс ретінде қала беретін шығар. Сондықтан білгім келетіні – қазір параның орташа көлемі қанша?
Нағима, Ақтөбе қаласы
Экономикалық қылмыстар мен сыбайлас жемқорлық деректерінің көбеюі «орташа пара» деген көлеңкелі ұғымды күнделікті қолданысқа енгізді. Бұған қатысты ресми талдаулар жүргізіл­мегенімен, 2008 жылы «Нұр Отан» ХДП жанын­дағы жемқорлықпен күрес жөніндегі қоғамдық кеңестің тапсырысымен Қазақстанның әлеумет­танушылар мен саясаттанушылар қауымдастығы арнайы мониторинг жариялап, тұңғыш рет пара берудің орташа көлемін анықтап берді. «Орташа пара» – соңғы жылдары жасалған бір сыбайлас жемқорлық келісіміндегі параның орташа мөлше­рі. Ол түрлі сала бойынша әр алуан анықталуы мүмкін. Айталық, екі жыл бұрын соттар орташа есеп­пен – 2092 доллар, жер қатынастары жөнін­дегі шенеуніктер – 1320, мемлекеттік қызмет істе­рі жөніндегі жоғары лауазымды шенеуніктер – 1050, әскери сала басшылары – 820, тұрғын үй-коммуналдық шаруашылық саласы басшылары 764 доллар көлемінде пара алған. Биылғы орташа айлық жалақы көлемінің өсуін ескерер болсақ, ор­таша пара көлемі де соншалықты көбейетіні сөзсіз. Айта кетейік, көрші Ресейде биыл орташа пара көлемі 44 мың рубльді құрап отыр.