Қазақ радиосының алғашқы басшылары кімдер?

Қазақ радиосына 90 жыл толғанын күнделікті естіп-біліп отырмыз. Радионың тарихын, ондағы алғашқы басшылардың кімдер болғанын білгім келеді.
Асқар БЕЛГІБАЙҰЛЫ, Қарағанды облысы
Қазақ АКСР Халық Комиссарлар Кеңесінің 1921 жылғы 29 қыркүйектегі шешімінің рес­публикалық радионың дүниеге келуіне тікелей әсері болды. Онда қазан айынан бастап Орын­бордағы радиостансы арқылы күн сайын 1600 сөзден тұратын өздері дайындаған радиобюллетеньді республикаға таратуға құқық берілді. Бұл республика әуе толқыны арқылы көпшілікке арналып берілген алғашқы радио хабарлары еді.  Алматы радиостансысы 1931 жылғы   1   мамырда  ашылды. Алайда оның хабарлары маусымның бас кезінде ғана тұрақты түрде таралып, көлемі тәулігіне алғашқыда – 4 сағат, ке­йінірек 6 сағат­тан 12 сағатқа дейін жеткізілді. Ал­ғашқы кездері Қазақ радиосын басқарған Ертай Арысов, Бек Дәулетбаев, Нияз Сыздықов, Абай Өтегенов, Кенжебек Есімов есімді азамат­тардың есімін ерек­ше атап өтуге тұрарлық. Олар кеңестік жү­йе­нің қырағы бақылауынан тайсалмай, қазақтың ұлттық үнін жеткізуге ұмтылды. Қоңыр дауысы «Алтын қордың» тө­рі­нен орын алған Әнуарбек Бай­жанбай, Сауық Жа­қанова тәрізді диктор­лар­дың есімдері радионың тарихында алтын әріппен мәңгілікке жазылып қалды.