Қазақ әдебиетінің антологиясы АҚШ-та жарық көрді

Жуырда АҚШ-та қазақ әдебиетінің антологиясы жарық көрген екен. Бұл жинаққа қандай қаламгерлеріміздің шығармалары енген?
Айбек БЕЙСЕНОВ, Алматы облысы
Күні кеше ғана Астанадағы Л.Гумилев атын­дағы Еуразия Ұлттық университетінде қазақ ақын-жазушыларының туындылары топтасты­рыл­­ған бұл антологияның тұсаукесер-танысты­рылымы болып өтті.
Аталған оқу орнының баспасөз қызметінің мәліметінше, ағылшын тілінде жарық көрген  The Stories of the Great Steppe. The Anthology of Modern Kazakh Literature атты қазақ әдебиеті антологиясы АҚШ-та басылып шыққан. Сыртқы істер министрі Ерлан Ыдырысовтың қолдауымен жарық көрген жаңа жинақтың құрастырушысы – Колумбия университетінің профессоры Рафиз Абазов. Бұл жұмысқа сондай-ақ еліміздегі М.Әуезов атындағы Әдебиет және өнер институты да атсалысқан. Шығар­маларды ағылшын тіліне аударған – Сер­гей Левшин және Илья Бернштейн. Құрастыру­шылар «Бұл антология басқа да құнды кітаптары­мыздың өзге тілде жарық көруіне жол ашпақ. Ағылшын тіліндегі антология шығару жалғасын тауып, алдағы уақытта да өзге автор­лар­дың туындыларымен толығады» деген пікір айтуда.
Кітапқа Оралхан Бөкейдің әңгімелері, Ғ.Мүсі­реповтің «Этнографиялық әңгімесі», Ә.Кекіл­баев­тің «Ұмытылған күндер балладасы», Т.Әбді­ковтің «Парасат майданы», М.Мағауиннің «Та­зы­ның өлімі», Р.Сейсенбаевтың «Әлем құлаған күн» және Д.Амантайдың прозалық шығармалары енген. Ал поэзиядан М.Мақатаев, Ж.Әбдрашев, О.Сүлейменов, Иран-Ғайып, Ф.Оңғарсынова, Б.Қанапиянов және Ш.Сариевтің өлеңдері топтастырылған.