Қастеев мұражайы қашан құрылған?

Жақын күндері Алматыға жолым түскелі отыр. Онда қазақтың әйгілі суретшісі Әбілхан Қастеев атындағы мұражай барын білемін. Бұл мұражай қашан құрылған және онда қандай дүниелер бар?
Болат Бекенұлы, Қызылорда қаласы
75 жылдық тарихы бар Алматыдағы Мемлекеттік Әбілхан Қастеев атындағы өнер мұражайы еліміздегі өнер сала­сын­дағы белгілі ғылыми-зерттеу мен мәдени-ағарту орталығы болып сана­ла­ды. Мұра­жайдағы бай және алуан түрлі жинақтар Қазақстан, Еуропа, Ресей, Шы­ғыс және бас­қа да шетелдердің көрке­мөнер мәде­ниеті туралы айқын түсінік бере отырып, бұрынғы және қазіргі кездегі шеберлер шығарма­шы­лығымен таныстыра алады.Бүгінгі таңда мұражай қорында 22 000-нан аса экспонат жинақталған. Әлемдік және ұлттық мәдени құндылықтарымыз мұра­жайдың 14 залына іріктелініп қойыл­ған. Мұражайда Батыс Еуропа елдерінің тамаша қойылымдарымен де танысуға болады. Экспозицияда ХVІ-ХІХ ғасыр­лар­дағы батыс елдерінен шыққан көр­кем­сурет мектептерін ұйымдастырушы өнер шеберлерінің туындылары жинақ­талған. Қастеев мұражайының ғылыми қызмет­керлері әр уақытта қор жинау, экспонат­­тар­ды ғылыми өңдеу, сақтау, қайта жаң­ғырту ісінде мол тәжірибелерін жүзеге асырып отырады. Қазіргі кезде мұражай жаңа мәдени бастамалардың орталығына айналып отыр. Өнер мұра­жайының кең де жан-жақты қарым-қатынастарының негі­зінде жүріп жатқан жұмыстары, өзінің тұрақ­ты қойылымдары мен уақытша көрмелері жүйелі түрде өткізіліп тұрады. Қазақстан шеберлерінің еңбектерінен, жақын және алыс шетел суретшілерінің шығармаларынан ұйым­дастырылатын көр­мелер, жеке жинақ­шы­лардың көрме­лері, жыл сайын өткі­зілетін галереялар парады өнерсүйер қауымның қызығушы­лығын күннен-күн­ге арттыра түсуде.