Персона нон-грата – сүйкімсіз саясаткер

Қазіргі кезде «персона нон-грата» деген сөзді оңды-солды көп қолданып жүр. Бұл ұғымның түпкі мағынасы қайдан шыққаны туралы айтып бересіздер ме?
Қайрат Базаров, Орал қаласы

Негізінде, бұл – дипломатиялық тер­мин. Persona non grata – латын тілінде «қажетсіз адам» дегенді білдіреді. Дип­ломатиялық тәжірибеде дипломатиялық өкілге шетел үкіметі оның келуіне агре­мандық бермей, сенімсіз, қажетсіз деп жариялауын «нон-грата тұлға» деп атай­ды. Егер шетелде қызмет етіп жүрген елші ағат кеткені, тыңшылық жасағаны немесе тұрып жатқан елдің заңын бұзғаны үшін нон-грата деп жарияланса, ол дереу еліне қайтарылуы тиіс. Қазіргі кезде бір елдің ар-намысына тиетін мәлімдемелер жасайтын кейбір сүй­кімсіз саясаткерлерді «нон-грата адам» деп атап, босағасынан аттатпайды. ТМД бойынша «нон-грата адам» деп жарияланған сүйкімсіз саясаткерлердің қара тізімінен көз сүрінеді. Украина Ресей депутаттары Владимир Жири­новскийді, Константин Затуллинді, теле­жур­налист Михаил Леонтьевті, саясаттанушы Алек­сандр Дугин мен Глеб Павловскийді «нон-грата адам» деп жариялады. Ал Ресей оған жауап ретінде украиналық ше­неу­ніктер Петр Порошенко мен Ни­колай Жулинскийге сенімсіздік таныт­қан болатын. Сол сияқты Латвияның Борис Березовский, Дмитрий Рого­зин­дерге есігі тарс жабық. Әзірбайжан Таулы Қа­рабаққа бола ресейлік ән­шілер Надежда Бабкина, Катя Лель, Валентина Лег­ко­ступова, Александр Песков, Ирина Отие­ва, «Чай вдвоем» тобына жылы қабақ танытпай қойды. Оны айтасыз, Маргарет Тэтчердің ба­ласы Марк Тэтчерді Монако елі жақ­тырмайды екен.