Патриоттық әндер байқауына қатыссам деп едім...

Жақында «Патриоттық әндерден республикалық байқау өтеді» деп естіп едім. Байқауға қатысу үшін нақты қандай мекемеге өтініш білдіру керек?
Алмас БАТЫРҰЛЫ, Қызылорда қаласы

Таяуда Мәдениет және ақпарат министрлігінің Мәдениет комитеті және «Қазақ әуендері» акционерлік қоғамы бірлесіп, «Елім менің» VI республикалық патриоттық әндер байқауы өткізілетіні туралы жариялаған еді. Байқау төрт аталым бойынша өтеді: «Атамекен» (Отан, туған жер туралы әндер); «Аманат» (ел тарихындағы түрлі ерліктер, рухани құндылықтар жайлы әндер); «Ән сал, сарбаз!» (Қазақстан Республикасының Қарулы күштері, Президент гвардиясының әскері, Ішкі істер министрлігі және Төтенше жағдайлар министрлігі жайлы әндер); «Елдің Ері – Бауыржан» (Кеңес Одағының батыры Бауыржан Момышұлының 100 жылдығына арналған әндер). Байқауға өзінің ең таңдаулы деген, бұрын еш жерде жарияланбаған, орындалмаған әндерін ұсынған кез келген қазақстандық композитор қатыса алады. Қатысушы өзінің шығармасын аудиотаспаға, CD, DVD немесе шағын дискілерге жазып, екі данамен, ал әннің мәтінін үш данамен өткізуі тиіс. Бір автор бірнеше аталым бойынша да қатыса алады. Қатысушылардың байқауға қатысу туралы өтініші мен қажетті құжаттары үстіміздегі жылдың 17 қарашасына дейін қабылданады. Байқауға қатысу үшін мына телефон нөмірлері бойынша хабарласыңыз: 8(7172) 390478, 390481, 390332, факс: 390514