Оның талантын Ғарифолла жоғары бағалаған

Қазақ ән өнері шеберлерінің бірі Қаламқас Орашева жайында білгім келеді.
Әйгерім Мұсақызы, Батыс Қазақстан облысы
Қаламқас Орашева 1953 жылы Орал облысы Ақжайық өңірінде дүниеге келген. Жас­тайынан батырлар жырын жатқа айт­қан. Сегізінші сыныпқа дейін өзінің туған ауы­лы Алғабаста, одан кейін Орал қа­ла­сындағы мектеп-интернатта оқыған. 1972 жылы мектеп бітіріп, Алматыдағы эстрада-цирк студиясына оқуға түскен. Жүсіпбек Еле­беков пен Ғарифолла Құрманғалиевтің сы­ны­бында тәлім алған. Қос тұлғаның сүйікті шә­кірт­терінің бірі болған. Әсіресе Ғ.Құрманғалиев әншінің та­лан­тын жоғары ба­ға­лаған.
«Қазақконцерт» бірлестігінде, Қазақтың мем­лекеттік Құрманғазы атындағы халық аспаптар оркестрінде, Алматы облыстық Сүйінбай атындағы филармонияда қызмет атқарған. Түркия, Италия, Франция, Вьет­нам, Үндістан мемлекеттерінде гас­троль­дік сапарларда болған. Нұрпейіс Байғаниннің «Нарқыз» поэмасын орындау арқылы ел ара­сында Нарқыз атанып кеткен. Өнер әле­мінен өзіндік орнын алған Қаламқас Ора­ше­ва бар болғаны 35 жасында дү­ние­ден оз­ған. Айтулы өнер иесінің туғанына биыл 60 жыл толды.