Монако мен Индонезияның туы бірдей ме?
Осы Индонезия мен Монаконың мемлекеттік туы өте ұқсас келеді. Бұл тулар шынымен бірдей ме?
Шолпан Қастерова, Алматы облысы
Индонезия 1945 жылы тәуелсіздік алып, ақ-қызыл жолақты мемлекеттік туын жариялады. Сол кезде тура сондай туы бар Монако князьдығы бұған ресми қарсылық білдіреді. Алайда Индонезияның мемлекеттік туы Монаконың туынан әлдеқайда көне екені дәлелденгеннен кейін князьдық ресми қарсылық жариялауын тоқтатты. Индонезияның туындағы ақ-қызыл жолақтар XIV ғасырдағы Маджапахит корольдігінен алынған. 1945 жылы 17 тамызда бекітілген, пропорциясы – 2:3.
Ал Монаконың дәл сондай туы 1881 жылы ІІІ Шарл князі ел билеген тұста белгіленген. Тудың түсі орта ғасырларда билік еткен Гримальди князьдарының таңдаған түсінен алынған. 1881 жылы 4 сәуірде бекітілген Монако туының пропорциясы – 4:5 немесе 2:3.
