Махамбет қай Қаройда жерленген?

Табыл Досымовтың зираты Махамбет жатқан Қаройда дегенді естідім.  Атырау жақта бірнеше Қарой деген атау бар. Осының нақты дерегін білсем деп едім.
Самат АБИЫРҰЛЫ, Ақтөбе қаласы
Ұзақ жылдар Махамбет шығармашы­лығын салалы түрде зерттеуші, академик Қажым Жұмалиев тек 1958 жылы ғана Махамбеттің денесінің қай жерге жерлен­генін анықтаған. Осы кезге дейін Махам­беттің дәл қай жерде жерленгені жөнінде деректі мәліметтер болмаған. 1927 жылы Ташкентте баспадан шыққан Халел Досмұхамедұлының Исатай мен Махамбет жайлы жазған кітабында және кейінгі әде­би-тарихи зерттеу еңбектерінде Махамбет Қарой деген Гурьев облысының жерінде қаза болды делінген. Ал, шынында, Гурьев облысының Есбол ауданында Қарой деп аталатын екі жер бар, бірі Жайық өзенінің Еуропа жағында, Нарын құмының шығыс беткейінде орналасқан мал жайы­лымы, екіншісі Жайықтың Азия беткейіндегі осы Махамбет бейіті орналасқан жердегі суы тұщы шегенді құдығы бар, шағын алқап еді. Жалпы, ел ішіндегі ақсақалдардың әңгімелеріне қарағанда, Ықылас Түлеев бастаған қаныпезерлер Махамбеттің басын денесінен бөлек шауып алып, Шыңғырлау өзенінің бойында орналасқан аға сұлтан Б.Айшуақовтың ставкасына апарып, сұлтаннан сыйлықтарын алып, сол маңға көміпті, ал денесі өлтірілген жерінде көмілген деген аңыз әңгімелер болатын. Академик Әлкей Марғұланның  айтуына қарағанда, 1847 жылы 30 нау­рыз­да Б.Айшуақов өлгеннен кейін Махам­беттің Шыңғырлауда жерленген басын ағайын-достары тауып алып, Индер көлінің маңындағы Қарой деген жерге әкеліп, денесі жатқан жерге көмген деседі. Табылды марқұмның сүйегі Махамбет батырдың денесі жатқан осы Қарой же­рін­де жерленген. Мұнда Табылдың ана­сы­ның да зираты бар.