Күй сайысында кім озды?

Жуырда Орал қаласында Құрманғазының құрметіне арналған күйшілер байқауында кімдер жеңімпаз атанды?
Бейсен Мергенұлы, Ақмола облысы
Күй атасы Құрманғазы Сағырбайұлының 190 жыл­дығына арналған «Күй алыбы – Құр­манғазы» атты рес­публикалық домбыра­шылар байқауы өз қорытын­дысын жариялады.
Батыс Қазақстан облысы әкімдігі, облыстық мәде­ниет басқармасы және халық шығарма­шылы­ғы орталығы ұйымдастырған байқауға республика­ның бірқатар өңір­лерінен 20 күйші қатысқан. Ұйымдастыру­шылардың мәлі­метінше, Қазақ­станның еңбек сіңірген қай­раткері, белгілі күйші Айтжан Тоқтаған баста­ған қазылар алқасы­ның ше­ші­мімен үш турдан тұратын сайыстың алғашқы екі кезеңі бойынша он екі үміткер іріктеліп, финалға жол­дама ал­ды. Байқау қорытын­дысында Ғ.Құр­манға­лиев атындағы БҚО филармониясы Дәулет­керей атын­дағы қазақ халық аспаптар оркес­трінің домбырашы­сы Ақыл­бек Бектасов бас жүлдені иеленсе, тағы бір оралдық жас талант Жарас Саты­балдиевке бірінші орын берілді. Аты­рау­лық Қайрат Жұмағалиев пен маңғыстаулық Асыл­бек Дәулетия­ров – екінші, қызылордалық Сандуғаш Тұр­ған­бек­қызы, орал­дық Арман Қыды­рәлиев, атырау­лық Ма­хамбет Сәбитов үшінші орынды еншіледі. Бұған қоса, бес күйші дипломант атанды. Дүбірлеп өткен дом­бы­ра­шы­лар байқауы Батыс Қазақстан облыстық қазақ драма театрында өтті. Бұл байқау алдағы уақытта да дәстүрлі түрде жалғасын тауып отырмақ.