Конституциялық Кеңестің қызметі не?

Бұрынғы Конституциялық соттың орнын басқан Конституциялық Кеңестің қызметі қандай?
Айбар, Жамбыл облысы 
Қазақстан Республикасының Конститу­циялық Кеңесі мемлекеттiк орган ретiнде республиканың бүкiл аумағында Қазақстан Республикасы Конституциясының жоғары тұруын қамтамасыз етедi.
Конституциялық Кеңес жетi мүшеден тұра­ды, олардың өкілеттілігі алты жылға созыла­ды. Республиканың экс-президенттерi құқығы бойынша ғұмыр бойы Конституциялық Кеңес­тің мүшелері болып табылады. Консти­туциялық Кеңес Қазақстан Республикасы  Президентінің, Сенат төрағасының, Мәжіліс төрағасының, Премьер-министрдің, Парла­мент депутаттарының жалпы санының кемiнде бестен бiр бөлігінің өтініштері бойын­ша: дау туған жағдайда республика Президе­н­­­тiнің сайлауын, Парламент депутаттарының сай­лауын өткізу және республикалық рефе­рендум дұрыстығы туралы мәселенi шешедi; Парламент қабылдаған заңдарға Президент қол қойғанға дейiн олардың Конс­титуцияға сәйкестiгiн қарайды; республика­ның халы­қ­аралық шарттары бекiтiлгенге дейiн олардың Конституцияға сәйкестiгiн қарайды; Консти­туция норма­ларына ресми түсiндiрме береді; Консти­туцияның 47-бабының 1 және 2-тармақ­тары­мен қарастырылған жағдайларда қорытын­ды­лар береді; Парламент және оның пала­талары қабыл­­даған қаулылар­дың республика Конституциясына сәйкес­тігін қарайды. 
Конституциялық Кеңес соттардың өтініш­терін қарайды. Егер белгілі бір істі қарау барысында сот қолданылуға жата­тын заң немесе өзге де нормативтік құқық­­тық акт адам мен азаматтың Конс­ти­туцияда баянды етілген құқықтары мен бостандық­тарына нұқсан келтіреді деп тапса, ол іс жүргізуді тоқтата тұрып, Конс­ти­туциялық Кеңеске бұл актіні консти­туция­лық емес деп тану туралы өтініш беруі тиіс.